Páskabíltúrinn 5. apríl 2007 06:00 Lengsta skyldufrí ársins er framundan. Nú eru góð ráð dýr fyrir fólk sem hefur ekki haft vaðið fyrir neðan sig og keypt sér skíðaferð til útlanda og á ekki heldur sælureit á landsbyggðinni. Í staðinn fyrir að dorma í fimmdaga súkkulaðimóki yfir dramatískum biblíuþáttum sting ég upp á gamla góða bíltúrnum. Það er ágæt leið til að drepa tímann fyrst maður getur ekki verið í vinnunni. Þessi bíltúr var kenndur við sunnudaga á mínum æskudögum og þótt framtíðin sé komin og geimárið 2007 runnið upp hefur lítið breyst. Áfangastaðir bíltúrsins eru þeir sömu og þeir voru. Höfuðborgarbúar eru enn bundnir af því að bara er fært í þrjár áttir. Hver átt hefur sinn þunglamalega sjarma, sérstaklega á þessum litlausa tíma árs. Að keyra í helgrárri súld til Keflavíkur fyllir jafnvel æstustu stuðbolta depurð. Því er eins gott að vera svangur því magafylli er einfalt ráð til að hrekja depurðina á brott. Í Keflavík er besta úrval lúgusjoppa á landinu og hamborgararnir, t.d. frá Bogga eða í Ólsen Ólsen, eru ferðarinnar virði. Í Poppminjasafninu má nú sjá stórgóða sýningu um fyrstu ár rokksins og Wilson Muuga liggur álkulegt í fjörunni hjá Hvalsnesi. Þá má keyra framhjá flugstöðinni og ímynda sér að maður sé að fara í burtu eða vera grand á því og skella sér í Bláa lónið. Hvalfjörður er guðdómlegur í góðu veðri. Rigningarsuddinn er líklegri svo kaffi á Hótel Glym er vænlegri en kaffisopi á grasbala. Rúnta má um Akranes og Borgarnes og pulsa sig í Hyrnunni. Þó fer maður sjaldnast í bíltúr í þessa átt, 2.000 kallinn í göngin hefur sitt að segja. Bíltúrsmöguleikarnir eru mestir austanfjalls og þangað liggur straumurinn. Sundlaugin í Hveragerði er með þeim bestu á landinu og heimilislegt er í Eden þrátt fyrir hrörnun. Við sjávarsíðuna hafa risið glæsilegir veitingastaðir og fólk á Stokkseyri hugsar um bíltúristana og hefur komið upp hindurvitnasöfnum og barnalandi. Svo er andlega uppbyggilegt að keyra framhjá Litla hrauni - hey, þetta gæti verið verra! Þá er næstu dögum reddað. Þó skal tekið fram að eingöngu má íhuga dauða Krists á krossinum á morgun - annars verða prestarnir brjálaðir. Viltu birta grein á Vísi? Sendu okkur póst. Senda grein Dr. Gunni Mest lesið Miðflokkurinn: fjarverandi í landi tækifæranna Lilja Hrund Lúðvíksdóttir Skoðun Valdatafl Skák og Mát! Lárus Guðmundsson Skoðun Er rúmdýnan þín hægt og rólega að murka úr þér líftóruna? Gunnar Dan Wiium Skoðun Íslensk kjör á íslenskum vinnumarkaði Kristrún Frostadóttir Skoðun Riddarar kærleikans Halla Tómasdóttir Skoðun En hér er ég ekkert... Nichole Leigh Mosty Skoðun Það sem „gleymist“ að segja Sigmar Guðmundsson Skoðun Viðbrögð við vanlíðan ungmenna Sandra Björk Birgisdóttir Skoðun Við getum ekki beðið í 131 ár Jódís Skúladóttir Skoðun Nýtt upphaf hjá Vinstri grænum Hólmfríður Jennýjar Árnadóttir Skoðun
Lengsta skyldufrí ársins er framundan. Nú eru góð ráð dýr fyrir fólk sem hefur ekki haft vaðið fyrir neðan sig og keypt sér skíðaferð til útlanda og á ekki heldur sælureit á landsbyggðinni. Í staðinn fyrir að dorma í fimmdaga súkkulaðimóki yfir dramatískum biblíuþáttum sting ég upp á gamla góða bíltúrnum. Það er ágæt leið til að drepa tímann fyrst maður getur ekki verið í vinnunni. Þessi bíltúr var kenndur við sunnudaga á mínum æskudögum og þótt framtíðin sé komin og geimárið 2007 runnið upp hefur lítið breyst. Áfangastaðir bíltúrsins eru þeir sömu og þeir voru. Höfuðborgarbúar eru enn bundnir af því að bara er fært í þrjár áttir. Hver átt hefur sinn þunglamalega sjarma, sérstaklega á þessum litlausa tíma árs. Að keyra í helgrárri súld til Keflavíkur fyllir jafnvel æstustu stuðbolta depurð. Því er eins gott að vera svangur því magafylli er einfalt ráð til að hrekja depurðina á brott. Í Keflavík er besta úrval lúgusjoppa á landinu og hamborgararnir, t.d. frá Bogga eða í Ólsen Ólsen, eru ferðarinnar virði. Í Poppminjasafninu má nú sjá stórgóða sýningu um fyrstu ár rokksins og Wilson Muuga liggur álkulegt í fjörunni hjá Hvalsnesi. Þá má keyra framhjá flugstöðinni og ímynda sér að maður sé að fara í burtu eða vera grand á því og skella sér í Bláa lónið. Hvalfjörður er guðdómlegur í góðu veðri. Rigningarsuddinn er líklegri svo kaffi á Hótel Glym er vænlegri en kaffisopi á grasbala. Rúnta má um Akranes og Borgarnes og pulsa sig í Hyrnunni. Þó fer maður sjaldnast í bíltúr í þessa átt, 2.000 kallinn í göngin hefur sitt að segja. Bíltúrsmöguleikarnir eru mestir austanfjalls og þangað liggur straumurinn. Sundlaugin í Hveragerði er með þeim bestu á landinu og heimilislegt er í Eden þrátt fyrir hrörnun. Við sjávarsíðuna hafa risið glæsilegir veitingastaðir og fólk á Stokkseyri hugsar um bíltúristana og hefur komið upp hindurvitnasöfnum og barnalandi. Svo er andlega uppbyggilegt að keyra framhjá Litla hrauni - hey, þetta gæti verið verra! Þá er næstu dögum reddað. Þó skal tekið fram að eingöngu má íhuga dauða Krists á krossinum á morgun - annars verða prestarnir brjálaðir.