Glimrandi gangur á skemmtistaðnum Glitni

„Jú, við vissum alveg af því að við ættum nafna á Íslandi. Og þykir það sorglegt hvernig komið er fyrir honum. Hins vegar er alveg glimrandi gangur hjá okkur og ekkert gjaldþrot í spilunum," segir Hans Andreasen, vert á veitinga- og skemmtistaðnum Glitni í Þórshöfn. Eins og flestum ætti að vera kunnugt um þá hefur færeyska ríkisstjórnin ákveðið að koma Íslandi til hjálpar á þessum síðustu og verstu og hyggjast veita þjóðinni lán upp á 300 milljónir danskra. Án nokkurra skilyrða ef marka má fyrstu fréttir.

Hans segir að Færeyingar allir hugsi hlýlega til íslensku þjóðarinnar á þessari stundu. Enda eigi þjóðirnar margt sameiginlegt. Hann bætir því hins vegar við að þetta sé kannski líka svolítið kaldhæðnislegt og fyndið; að litla eyjan skuli koma þeirri stóru til hjálpar. Ekki síst í ljósi íslensku útrásarinnar þar sem Íslendingar blönduðu geði við stórþjóðir en gleymdu kannski sínum nánustu á Færeyjum. En fyrst og fremst er Andreasen ánægður með aðstoð færeysku ríkisstjórnarinnar. Og telur að þetta eigi eingöngu eftir að styrkja vináttubönd landanna. „Við höfum mikla trú á Íslendingum og teljum að þeir verði fljótir að ná sér á strik. Og kannski í framtíðinni, ef Færeyjar lenda í viðlíka vandræðum, eiga Íslendingar eftir að koma okkur til aðstoðar."

Færeyingar hafa alltaf notið töluverðrar hylli á Íslandi. Færeysk tónlist hefur alltaf átt upp á pallborðið hjá Íslendingum og er skemmst að minnast vinsælda Eivarar Pálsdóttur. Færeyska X-factor-stjarnan Jógvan var, eins og aðrir Íslendingar, ákaflega upprifinn yfir stuðningi landa sinna. „Mér finnst þetta bara ótrúlega fallega gert af samlöndum mínum," segir hann en bætir því við að Færeyingar hafi haft virkilegar áhyggjur af frændum sínum. „Fólk var að hringja í mig og spyrja mig hvort mig vantaði mat, hvort greiðslukortin virkuðu og svoleiðis. Þeir höfðu virkilegar áhyggjur," útskýrir Jógvan en bætir því við að Færeyingar viti nákvæmlega hvernig íslensku þjóðinni líði. „Við vitum alveg hvað kreppa er, það eru bara fimmtán ár síðan við upplifðum það sama, fólksflótta og atvinnuleysi. Og Færeyingum er því ekki beint hlátur í huga." Jógvan er ekkert á þeim buxunum að yfirgefa Ísland þrátt fyrir bagalegt efnahagsástand. „Ég fann ekkert fyrir kreppunni í Færeyjum á sínum tíma og ætla því að standa þessa af mér."- fgg