Dow Jones-hlutabréfavísitalan féll um heil 200 stig, rúmt prósentustig við upphaf viðskiptadagsins í Bandaríkjunum í dag. Heldur blés í lækkunina eftir því sem á leið og féllu helstu vísitölurnar um 1,8 prósent að meðaltali rúmum klukkutíma síðar.
Slæmar afkomutölur fyrirtækja á borð við trygginga- og fjármálarisann AIG og tölvurisann Dell eiga stóran þátt í lækkanaferlinu en fjárfestar þóttust greina slæmar horfur í máli forsvarsmanna fyrirtækjanna.
Þá eiga tölur um stöðnun í einkaneyslu á milli mánaða hlut að máli. Það þykir auka líkurnar á samdrætti í einkaneyslu vestanhafs til muna.
Bandarískt hagkerfi er að langmestu leyti drifið áfram af einkaneyslu. Samdráttur í þeim flokki getur því haft víðtæk áhrif, svo sem smitað út frá sér í minni innflutningi. Gerist það er reiknað með að áhrifanna gæti gætt hjá helstu viðskiptalöndum Bandaríkjanna.
