Harmur englanna bestur

Niðurstöður í árlegri verðlaunaveitingu starfsfólks í bókaverslunum voru tilkynntar í gær og er það í tíunda sinn sem starfsmenn bókaverslana safna saman áiti sínu um mikilvægustu útgáfuverk, ekki aðeins í einum flokki heldur sjö.

Verðlaunin eru veitt í flokkunum íslensk skáldverk, þýdd skáldverk, íslenskar barnabækur, þýddar barnabækur, ævisögur, ljóð og fræði- og handbækur.

Sextíu bóksalar tóku þátt þetta árið og var mjótt á munum í mörgum flokkum, til dæmis skildu tvö atkvæði að fyrsta og annað sætið í skáldsögunum. Verðlaunaféð er 0 kr. og hefur ekkert breyst frá upphafi. Hins vegar láta aðstandendur prenta límmiða sem gjarnan skreyta þær bækur sem valdar eru. Verðlaunabækur bóksölufólks hafa oft reynst hafa sterkari stöðu er frá líður en þau verk sem tilnefnd eru eða verðlaunuð í verðlaunarekstri Félags íslenskra bókaútgefenda og embættis forseta Íslands, til dæmis völdu bóksölumenn Öxina og jörðina og Himnaríki og helvíti bestu bækur sinna útgáfuára – en hvorug þeirra var tilnefnd eða hlaut hin Íslensku bókmenntaverðlaun.

Upplýsingar um hvaða bækur bóksalar hafa valið síðastliðin níu ár má nálgast á vef Borgarbókasafnsins: http://www.borgarbokasafn.is/desktopdefault.aspx/tabid-3449//5529_read-13458/.

Í dálknum hér til hliðar má sjá hvernig tókst til um valið, ekki aðeins hvaða titlar settust í fyrstu sætin, heldur líka hverjir komu þar á eftir, í nokkrum flokkum allt að fimm titlar. Skáldsaga Jóns Kalmans, Harmur englanna sem Bjartur gefur út er talin besta skáldsagan, en Leikur engilsins eftir Carlos Ruiz Zafón besta þýdda skáldsagan, en útgefandi er Mál og menning – Forlagið. Í fræðiritum var Jöklasaga Helga Björnssonar í mestum metum, en hún er frá forlaginu Opnu. Gyrðir Elíasson er talinn hafa sent frá sér markverðustu ljóðabókina, Nokkur orð um kulnun sólar sem Uppheimar gefa út. Besta barnabókin er talin vera útgáfa Máls og menningar á úrvali Silju Aðalsteinsdóttur á sögum, þjóðsögum og ævintýrum, úr safni Jóns Árnasonar og fleiri, en bókina myndskreytir Halldór Baldursson. Besta þýdda barnabókin er valin Hver er sterkastur eftir Mario Ramos sem Bjartur gefur út. Af góðu úrvali ævisagna velja bóksölumenn ævisögu Vigdísar sem Páll Valsson skráði.

pbb@frettabladid.is