Kannski finnum við nýjan Kalla Bjarna

Áheyrnarprufur fyrir Idol Stjörnuleit fara fram á morgun á Hótel Hilton Reykjavík Nordica. Vísir hafði samband við annan kynninn Jóhannes Ásbjörnsson, betur þekktan sem Jóa, og dómarann Jón Ólafsson.

„Ég er rígspenntur alveg. Er að búa mig undir hópfaðmlög, gleði, svita og tár," svarar Jói aðspurður hvernig keppnin leggst í hann en rúmlega 2000 manns hafa nú þegar skráð sig í keppnina.

„Ég held að morgundagurinn verði erfiðasti dagurinn, andlega sem líkamlega fyrir okkur dómnefndarfólk," segir Jón.

„Við þurfum að hlusta á yfir eitt hundrað keppendur á einum og sama sólarhringnum. Eins gott að fara snemma í bólið í kvöld. Sjálfur auglýsi ég eftir amfetamínplástrum til að líma á mig svo ég verði með fullt energí allan tímann. Annars hlakka ég barasta til og vona við reynumst réttsýn og sanngjörn í djobbinu," segir Jón.

Góð ráð til handa keppendum?

„Keppendur ættu að sleppa því að fara út á lífið í kvöld. Þeir sem reykja ættu ekki að hætta því fyrr en eftir prufurnar því það tekur tíma fyrir systemið að hreinsa sig," segir Jón.

„Enginn ætti að mæta ölvaður í prufurnar eða undir áhrifum fíkniefna því ég er með þvagprufugræjur frá Frjálsíþróttasambandinu og mun vera með slembiúrtak á fjögurra tíma fresti til að kanna hvort einhver þátttakandinn sé ólöglegur," segir Jón og heldur áfram:

„Svo er alltaf gott að hlusta á einn til tvo Nýdönsk diska með reglulegu millibili. Bara fyrir andann sko."

„Keppendur þurfa að spyrja sig: „Hvað er það sem ég hef sem hinir 1999 hafa ekki?" Passa svo að hafa það meðferðis," segir Jói.

Eruð þið spenntir? „Ég er forvitinn og spenntur fyrir morgundeginum. Kannski finnum við nýjan Geirmund, eða nýjan Kalla Bjarna? Þetta verður gríðargaman," svarar Jón og Jói bætir við: „Tvö þúsund skráningar segja allt sem segja þarf. Væntingarnar eru eftir því."