Merzedes Club keppir í alþjóðlegri söngvakeppni

„Við fundum þetta lag og okkur fannst það fullkomið fyrir Eurodanceweb,“ segir Ítalinn Boris Zuccon, stjórnandi síðunnar Eurodanceweb.net.

Lag hljómsveitarinnar Merzedes Club, Meira frelsi, hefur verið valið í alþjóðlega söngvakeppni síðunnar sem er nú haldin í níunda sinn.

„Við vissum af hljómsveitinni því hún tók þátt í undankeppni Eurovision og sýndi litrík tilþrif. Við fylgjumst með danstónlistarsenunni úti um allan heim og vorum forvitin að heyra eitthvað nýtt frá Merzedes Club,“ segir Boris.

Keppnin stendur á milli vinsælla danstónlistar-laga frá 39 þjóðum. Dómnefnd sem er skipuð plötusnúðum, blaðamönnum og upptökustjórum víða um heim velur sinn sigurvegara en einnig geta netverjar kosið uppáhaldslagið sitt á síðunni. Tilkynnt verður um úrslitin í flokkunum tveimur í lok ársins. Ísland hefur þrisvar sinnum áður tekið þátt í keppninni, sem fer eingöngu fram á netinu.

Í fyrra keppti Páll Óskar fyrir Íslands hönd með endurhljóðblöndun af laginu Betra líf og lenti í næstneðsta sæti. Árið 2003 tók GusGus þátt með laginu Call of the Wild og lenti í þrettánda sæti en besta árangrinum náði Bjartmar Þórðarson árið 2007 þegar hann varð ellefti með lagið Vil annan dag í paradís. „Íslandi hefur ekki gengið vel til þessa en við höldum að ykkur gangi betur í ár því lagið hefur mjög alþjóðlegan hljóm,“ segir Boris um Meira frelsi.

„Íslendingar hafa núna einn mánuð til að kjósa Merzedes Club.“

Sigurvegarar keppninnar fá glæsileg sýndarverðlaun frá Eurodanceweb. Engin peningaverðlaun eru í boði og ekkert meira fæst fyrir sigurinn, nema auðvitað heiðurinn sem honum fylgir. Reyndar stefna Boris og félagar á að halda tónleika á Ítalíu á næsta ári til að fagna tíu ára afmæli Eurodanceweb þar sem fjöldi tónlistarmanna myndi koma fram.

Hlynur Áskelsson úr Merzedes Club er ánægður með þátttökuna í keppninni. „Þetta hlýjar mér um hjartaræturnar en kemur mér ekki á óvart. Við prufukeyrðum þetta lag í Portúgal á sínum tíma og þá var Merzedes Club að trekkja að, enda er Barði frábær tónlistarmaður,“ segir Hlynur og á þar við höfundinn Barða Jóhannsson. Hlynur útilokar ekki endurkomu Merzedes Club í framhaldinu með tilheyrandi tónleikaferð. „Við gáfum út stórkostlega plötu sem við náðum aldrei almennilega að fylgja eftir. Það yrði æðislegt ef við myndum vinna þetta því við erum orðin svo blönk núna. Við gerum hvað sem er fyrir meira brúnkusprey og nokkrar evrur.“ freyr@frettabladid.is