Entourage að hætta

Bandaríska sjónvarpsstöðin HBO hefur tilkynnt að þáttaröðin Entourage ljúki göngu sinni á næsta ári. Orðrómur hafði verið uppi um að þættirnir myndu syngja sitt síðasta árið 2011 og það hefur nú verið staðfest. „Við stefnum fyrst á að klára þessa þáttaröð. Það verða færri þættir í næstu þáttaröð, hugsanlega sex,“ sagði Michael Lombardo hjá HBO. Hann bætti því við að Entourage-kvikmynd verði mögulega gerð í framtíðinni. Sjöunda þáttaröð Entourage er sýnd í Bandaríkjunum um þessar mundir. Þættirnir, sem fjalla um líf ungrar kvikmyndastjörnu í Hollywood, hafa notið mikilla vinsælda og unnið til fjölda verðlauna.