Punkturinn vinsæll á netinu

Grínþátturinn Punkturinn hefur notið vaxandi vinsælda á netinu að undanförnu. Þar eru á ferðinni hárbeitt og fjölbreytt grínatriði þar sem skotspónninn er samfélagið, auglýsingar og ýmislegt annað.

„Við byrjuðum að gera þetta ég og félagar mínir þegar við vorum í MK. Við ákváðum að krydda upp á félagslífið með því að koma með „sketsa"-þætti í annarri hverri viku," segir Tómas Aguinas Rizzo, annar af tveimur leikstjórum þáttanna. Hinn leikstjórinn heitir Sindri Gretarsson og þeir báðir eru handritshöfundar ásamt Guðmundi Heiðari Helgasyni.

Síðasta haust var ákveðið að gera meiri alvöru úr gríninu og vanda enn frekar til verka. „Við tókum saman „best of"-þátt úr gamla efninu og settum á Facebook og Youtube til að sjá viðbrögðin. Þau voru mjög jákvæð þannig að við ákváðum að kalla hópinn saman og byrja upp á nýtt," segir Tómas. Síðan þá hafa sjö þættir verið gerðir og er sá áttundi á leiðinni í lok mánaðarins. Þar verða nokkrar þekktar manneskjur í litlum hlutverkum, þar á meðal Maggi Mix.

Við gerð þáttanna er notuð Canon 5D-vél þar sem tekið er upp í háskerpu, auk þess sem hljóðgræjurnar eru vandaðar. „Það er mjög mikið atriði að þetta líti vel út og hljómi vel. Okkur finnst það jafnmikilvægt og það að sketsarnir séu að virka," segir Tómas.

Hér fyrir ofan er hægt að sjá sjöunda þátt Punktsins en fleiri þætti er hægt að nálgast á síðunni Kvikmyndir.is, Facebook og á Youtube. - fb