Eftirminnilegast þegar bróðir minn datt í sjóinn og pabbi á eftir

Veiðiáhuginn hjá Einari Braga Aðalsteinssyni kviknaði þegar hann var þriggja ára gamall en maríulaxinn veiddi hann á eftirlætisveiðistaðnum sínum, Blikadalsá.

Hvað ertu gamall?

"Ég er alveg að verða 10 ára. Afmælið mitt er 22. ágúst."

Hvenær kviknaði veiðiáhuginn?

"Svona um þriggja ára aldurinn.

Hvað ertu gamall?

"Ég er alveg að verða 10 ára. Afmælið mitt er 22. ágúst."

Hvenær kviknaði veiðiáhuginn?

"Svona um þriggja ára aldurinn. Afi var alltaf að tala um veiði og leyfði okkur krökkunum að koma með sér í veiðiferðir. Það var mjög gaman."

Hvenær veiddir þú fyrsta fiskinn og hvar?

"Ég hef verið svona 4-5 ára gamall, í stóru vatni sem ég man ekki hvað heitir."

Hvar er skemmtilegast að veiða?

"Í Blikadalsá því að maður veiðir svo mikið af laxi þar."

Hvers vegna er gaman að veiða?

"Maður verður svo stoltur af því að veiða fisk, það er svo gaman að draga inn og sjá hvernig fengurinn lítur út."

Hver fer með þér að veiða?

"Afi og pabbi eru alltaf til í að skella sér með mér. Stundum kemur Bjarki bróðir minn líka og Arnór Sveinn, en þeir eru svo uppteknir í fótboltanum og komast ekki oft."

Hver er eftirminnilegasta veiðiferðin?

"Það var eftirminnilegt þegar við vorum að veiða á höfninni á Akureyri, ég, pabbi og Bjarki bróðir minn, fyrir nokkrum árum. Það gekk eitthvað mikið á þegar við vorum að draga inn og endaði þannig að Bjarki datt í sjóinn og pabbi á eftir honum þegar hann var að reyna að koma Bjarka upp úr. Þetta var mjög fyndið. Svo var líka eftirminnilegt að fá maríulaxinn í Blikadalsá."

Hvað er stærsti fiskur sem þú hefur veitt?

"Það var sex punda lax sem ég veiddi í fyrra í Blikadalsá."

Finnst þér fiskur góður á bragðið?

"Já mjög góður. Ég elska allan fisk en mest þó silung."

Hver er uppáhaldsfiskrétturinn?

"Bestur finnst mér nýr fiskur soðinn eða grillaður í heilu lagi. Svo finnst mér plokkfiskur góður."

Gætirðu hugsað þér að vinna í fiskbúð, eða sem sjómaður?

"Já hvort tveggja. Í fyrra sótti ég um starf í fiskbúðinni í Kópavogi en var sagt að ég væri of ungur. Þá langaði mig svo mikið að læra að gera að fiskinum. Ég kunni það svona nokkurn veginn en vildi læra að gera það alveg rétt. Ég sæki bara um aftur þegar ég verð aðeins eldri."

Áttu þér fleiri áhugamál en veiðar?

"Já, íþróttir. Ég æfi fótbolta með Breiðabliki, handbolta með HK og svo er ég í skólahljómsveit Kópavogs og spila á trommur. Mér finnst líka gaman að fróðleik um allt mögulegt. Síðan á ég tvö dýr - kisuna mína Perlu sem er rúmlega 18 ára gömul og hamsturinn Lubbalínu sem ég fékk í vetur."