Bjartsýn í Blöndu þrátt fyrir ládeyðu

Birgitta H. Halldórsdóttir á Syðri-Löngumýri, veiðivörður við Blöndu, segir sumarið hafa verið mjög gott þó að veiðin hafi verið dræm. Seiðtalning lofi góðu.

Heildarveiðin í Blöndu í sumar var 833 laxar auk þess sem 107 silungar voru færðir til bókar. Efri svæðin þrjú voru afar slök. Á svæði II veiddust 66 laxar og 58 silungar. Á svæði III komu 54 laxar og 21 silungur á land. Á efsta svæðinu náðust síðan aðeins 45 laxar og 21 silungur. Á svæði I veiddust 668 laxar og sjö silungar.

Heildarveiðin í Blöndu í fyrra 2.032 laxar og árið þar á undan heilir 2.777 laxar. Veiðivörðurinn lætur þennan samanburð ekki slá sig út af laginu.

"Ég verð að segja að ég átti mjög gott sumar sem veiðivörður. Veður var dásamlegt og veiðimenn til fyrirmyndar," segir Birgitta. "Vissulega var dræm veiði í ánni þetta sumar en ég hef ekki áhyggjur af framtíðinni þar sem seiðatalning í sumar lofar góðu."

Þá segir Birgitta að ekki hafi allir dagar verið fullbókaðir í Blöndu. "Það er ekki óeðlilegt sökum dræmrar veiði," segir hún.

Birgitta segir veiðimennina sjálfa almennt hafa verið mjög ánægða. "Enda er Blanda mjög spennandi laxveiðiá þótt eflaust hefðu menn viljað hafa meiri afla þetta sumarið. Við megum samt ekki gleyma því að þetta á við um allar ár hér norðanlands," bendir veiðivörðurinn á og hvetur menn til að að horfa fram á veginn:

"Vonandi fáum við fljótlega ár eins og 2011 þar sem allt var vaðandi í fiski, að minnsta kosti erum við bjartsýn hér á Blöndubökkunum," segir Birgitta H. Halldórsdóttir.