Veiðin í Hofsá er betri en í fyrra

Hofsá í Vopnafirði er eina áin á topp tíu lista Landssambands veiðifélaga sem er með betri veiði en í fyrra. Rangárnar tróna á toppi listans.

Hofsá er komin í 843 laxa sem er töluvert betra en á sama tíma í fyrra en þá stóð hún í 746 löxum. Þetta verður að teljast til tíðinda enda laxveiðisumarið heilt yfir verið óvenju slakt, svo ekki sé meira sagt. Í síðustu viku var 101 laxi landað í ánni sem er meira en vikuna þar á undan þegar það veiddist 91 lax. Hofsá er í 6. sæti yfir aflahæstu árnar það sem af er sumri.

Sem fyrr trónir Ytri Rangá á toppi listans en í gær höfðu 2.932 laxar veiðst í ánni á sama tíma í fyrra var veiðin 3.388 laxar. Síðasta vika gaf 344 laxa sem er svipað og vikuna á undan en þá veiddist 351 lax.

Veiðin í Eystri Rangá er komin í 2.300 laxa sem er ríflega þúsun löxum lakari veiði en á sama tíma í fyrra en þá voru 3.372 komnir á land. Vikuveiðin var betri en vikuna á unda. Nú veiddust 236 laxar en 179 í þarsíðustu viku.

Selá í Vopnafirði, Miðfjarðará og Haffjarðará koma næstar á eftir Rangánum. Veiðin í ánum þremur er lakari en í fyrra en þó geta veiðimenn í þeim vel við unað því veiðin í langflestum hinna "stóru" ánna hefur dalað miklu meira milli ára. Í því sambandi er til dæmis hægt að nefna Norðurá, Þverá og Kjarrá, Laxá í Kjós, Grímsá og Laxá í Aðaldal.

Í Selá hafa veiðst 1.278 laxar en á þessum tíma í fyrra voru 1.726 laxar komnir á land. Veiðin í síðustu viku var 97 laxar samanborið við 79 laxa vikuna á undan.

Alls eru 1.207 laxar komnir á land í Miðfjarðará en í fyrra á sama voru þeir 1.915. Veiðin í Miðfjarðará dalaði nokkuð milli vikna. Í síðustu viku veiddust 95 laxar en þeir voru 141 vikuna á undan.



Veiði í Haffjarðará með ágætum

Miðað við almennt mjög dapurt laxveiðisumar hefur veiði í Haffjarðará verið með ágætum. Nú eru 1.006 laxar komnir á land samanborið við 1.360 í fyrra. Vikuveiðin var 51 lax sem er nækvæmlega það sama og vikuna á undan.

Veiði í Langá tók kipp í síðustu viku sem má án efa rekja til þess að í fyrsta skiptið í sumar var leyft að veiða á maðk í ánni. Langá er komin í 833 laxa en á sama tíma í fyrra var veiðin 1.626 laxar. Alls veiddist 131 lax í vikunni en vikuna þar á undan veiddist 82 laxar.

Blanda fór á yfirfall fyrir nokkru síðan og veiðin stendur nú í 831 laxi. Á vef Lax-á kemur hins vegar fram að vísbendingar séu um að áin sé að fara af yfirfalli, því rennslið hafi minnkað töluvert undanfarna daga. Í Norðurá hafa veiðst 822 laxar sem er miklu lakara en á sama tíma fyrra þegar 2.068 laxar voru komnir á land. Sautján laxar veiddust í Elliðaánum síðustu viku og er veiðin komin í 761 lax.

Þverá og Kjarrá er komin 645 samanborið við 1.670 á sama tíma í fyrra. Í Laxá í Aðaldal hafa veiðst 379 laxar en á sama tíma í fyrra var veiðin 925 laxar. Veiðin í Laxá í Kjós stendur í 375 löxum. Á sama tíma fyrra voru 800 laxar komnir á land.

Þeir sem vilja rýna í laxveiðitölurnar er bent á vef Landssambands veiðifélaga - angling.is.

trausti@frettabladid.is