Axl Rose hatar mig

Slash, fyrrum gítarleikari Guns N"Roses, telur að söngvarinn Axl Rose hati sig. Í viðtali við Rolling Stone sagðist Slash endilega vilja spila með Guns N"Roses þegar hljómsveitin verður vígð inn í Frægðarhöll rokksins í Ohio 14. apríl. Hann gerir sér samt grein fyrir því að það mun ekki verða af því enda talar hann aldrei við Rose. „Hann hatar mig. Það eru margar ástæður fyrir því og ég veit ekki hverjar þær allar eru,“ sagði Slash, sem gefur út sína aðra sólóplötu, Apocalyptic Love, 21. maí.