Lærir sverðatækni fyrir Norsku Óperuna

„Það er gaman hvað norska listasamfélagið hefur tekið mér vel og ég er óendanlega þakklátur fyrir þau tækifæri sem ég fæ," segir leikarinn Ívar Örn Sverrisson sem hefur fengið hlutverk í óperunni Aidu hjá Norsku Óperunni.

Ívar Örn hefur verið búsettur í Ósló ásamt fjölskyldu sinni í rúmt ár og og datt í lukkupottinn þegar hann var ráðinn til starfa hjá Norsku Óperunni fyrir uppsetningu á Aidu.

„Það er ekkert sjálfsagt að fá tækifæri hérna. Ég er dansari í Aidu og tek meðal annars þátt í stóru bardagaatriði með samúræjasverðum," segir Ívar, en uppsetningin er mjög stór og þegar mest lætur eru um 100 manns á sviðinu í einu.

„Við strákarnir sem leikum í bardagaatriðunum höfum fengið sérstaka þjálfun í sverðatækni sem nefnist Battodo Fudokan og er blandað inn í dansinn á skemmtilegan hátt."

Ívar Örn er á fullu við æfingar þessa dagana en óperan er frumsýnd á laugardaginn og uppselt langt fram í tímann. Ívari Erni líkar lífið vel í Noregi en honum hefur gengið vel að fóta sig í norska leikhúsheiminum. Þegar hann var nýkominn út fékk Ívar til dæmis hlutverk með leikhópnum Grusomhetens Teater. „Maður fer í þær prufur sem eru í boði og reynir svo að bíða bara rólegur eftir næsta verkefni."

Ívar hefur einnig verið að fylgjast með viðtökum á stuttmynd sem hann lék í fyrir nokkru síðan. Myndin var tekin upp í Skotlandi og nefnist Tumbult.

„Myndinni er leikstýrt af Johnny Barrington og var frumsýnd á Sundance hátíðinni í byrjun árs og ferðast nú um heiminn á hinar ýmsu hátíðir." -áp