Notar maskara sem þykkir hárin og þéttir

Bjargey Elíasdóttir sem búsett er í Lúxemborg upplýsir okkur hvaða snyrtivörur hún notar.

"Upphaflega byrjaði ég að nota snyrtivörur 14 ára gömul. Þær voru svartur maskari og fölur varalitur. Í raun var það ekki fyrst varalitur sem ég setti á varirnar heldur zinkpasti sem ég og vinkona mín settum á okkur til að gera varirnar hvítar. Það var í tísku þá að hafa hvítar varir. Við vorum að gera okkur sætar fyrir Kinks hljómleika í Austurbæjarbíói.

Allar götur síðan hefur mér fundist þetta tvennt mikilvægast fyrir mig og þykir enn. Augu og varir eru það mikilvæga í andlitinu okkar og segja margt um hvernig okkur líður," segir Bjargey áður en upptalning hefst.

Dior varalitur

"Minn uppáhalds varalitur núna er frá Dior. Dior Addict nr. 612 "spotlight" Hann frískar uppá varirnar, undirstrikar brosið og kallar fram náttúrulegan lit varanna, án þess að vera áberandi. Hann nota ég daglega, ef ég fer út að kvöldi set ég yfirleitt aðeins rauðari lit á varirnar."

Brown Shaping kit frá Benefits

"Þegar ég var ung þá var ég sambrýnd með þykkar dökkar augabrýr. Þær hafa nú þynnst og ég hef líka verið að plokka þær í gegnum tíðina. Svo nú þarf ég að hjálpa þeim, bæði hressa þær við með lit og lyfta og til þess nota ég Benefits vörurnar "Brow Shaping kit" og "quick set brow gel" algerlega ómissandi fyrir mig."

YSL maskari

"Maskarinn sem ég hef notað síðast liðin 2 ár er frá YSL "shocking" hann þykkir hárin og þau virðast þéttari, burstinn er góður fyrir mín augnahár og þessi maskari klessist ekkert. Augnahárin mín eru frekar gisin og stundum set ég svart gel í augnahára botninn með hár fínum bursta til að þau sýnist þéttari. Mér finnst mjög mikilvægt að nota augnahára uppbrettara áður en ég set maskarann á."

Naked 2 urban decay augnskuggar

"Það fer ekki framhjá okkur þegar við eldumst að augnsvipurinn okkar dofnar og því þarf að nota skugga til að gefa augunum meiri dýpt og þokka ef má segja svo. Mín uppáhalds lita palletta er "Naked 2 urban decay" í boxinu eru 12 skuggar sem hægt er að leika sér með, allt eftir því í hverju maður er í og hvað stendur til. Og burstinn í boxinu er sá bersti sem hægt er að fá. Góður fyrir eldri húð, því hún er jú ekki rennislétt lengur. Burstar og pennslar eru svo mikilvægir fyrir förðun og gæði þeirra eru mismunandi. Það er mikilvægt að geta eignast marga og góða bursta ef hægt er. Ég þvæ mína bursta reglulega með handsápu, skola og þerri varlega með handklæði. Burstana sem eru með lengri og þykkari hárin þurrka ég stundum með hárþurrku."

Dior Captur Totale meik

"Dior vörurnar hafa mér alltaf fundist góðar og hef lengi haldið mig við Dior meik og laust púður í línunni "Capture Totale".

"Já það er sko langt síðan að Kinks hljómleikarnir voru, en það er enn jafn gaman að setja á sig "andlit" mála sig og hressa smá uppá útlitið þó maður sé orðin 60 ára. Það breytist ekki," segir Bjargey áður en kvatt er.