Víraði víólistinn segir eggjakastið hafa verið mótmæli

Víóluleikarinn Natalie Holt, sem þrammaði á mitt sviðið í úrslitaþætti Britain´s got talent í gærkvöldi og grýtti eggjum í dómarana, þar á meðal Simon Cowell, segir í viðtali við The Daily Telegraph í dag að hún hafi gert þetta til þess að mótmæla ömurlegum áhrifum Cowell á tónlistariðnaðinn og uppgerðarsöng (e. miming).

Þessi ummæli birtust á vef Telegraph aðeins tveimur klukkustundum eftir að hún bað bræðurnar, Richards og Adams sem stóðu syngjandi á sviðinu þegar uppákoman átti sér stað, afsökunar.

Sjálf er Holt víóluleikari en hún spilaði undir atriðinu ásamt hljómsveit sinni Raven kvartettnum. Hinar þrjár konurnar í hljómsveitinni hafa gagnrýnt gjarðir hennar og segjast ekki hafa vitað hvað stæði til.

Holt er sjálf hæfileikaríkur tónlistarmaður og var til að mynda tilnefnd til Bafta verðlaunanna fyrir tónsmíðar sínar í sjónvarpsþættinum Great Expectations. Hún spilaði einnig tónlist í  kvikmyndinni Hannibal Rising og stórmyndina Stardust. Þá hefur hún spilað í helstu tónleikahúsum veraldar.

Hún hefur einnig unnið með stórstjörnum úr poppiðnaðinum, meðal annars Gwen Stefani, Take That, Susan Boyle og fjölmörgum öðrum.

Lögreglan var kölluð á vettvang vegna uppákomunnar í gærkvöldi en ekki þótti ástæða til þess að handtaka tónlistarkonuna og hafa forsvarsmenn þáttarins ákveðið að kæra hana ekki.

Dómararnir létu hana þó heyra það eftir flutning bræðranna í gærkvöldi, Amanda Holden, einn dómaranna, sagði meðal annars að Natalie væri heimsk belja (e. stupid cow.)

Cowell snéri þessu raunar upp í grín, og sagði þáttinn hafa „the eggs-factor“ (sem er afbökun á X-factor).

Gula pressan í Bretlandi hefur gert mikið úr málinu í dag, meðal annars hefur Daily Mail fjallað ítarlega um málið. Þar er haft eftir gesti í salnum að Holt hafi birst upp úr engu, brosað eins og brjálæðingur og byrjað án fyrirvara að kasta eggjum í Cowell.