Sannleikurinn: 65% hjónabanda á Íslandi enda með dauða

Um 65% hjónabanda á Íslandi enda með dauða. Þessi tíðni hefur lítið breyst hér á landi undanfarinn aldarfjórðung. Aðeins 35% hjónabanda enda farsællega með skilnaði.

Aldrei hafa fleiri gengið í hjónaband en árið 2007 en hjónavígslum hefur fækkað síðan og má þakka árangurinn því mikla forvarnarstarfi sem farið hefur fram. Sem betur fer er mikið af óhamingjusömum hjónum þarna úti sem draga úr löngun okkar hinna til að gifta okkur og smám saman veslast upp og deyja.

Rannsóknir á hjónaböndum benda sterklega til að því lengur sem fólk er gift, því líklegra er að hjónabandinu ljúki með dauða annars aðilans og er skilnaður það eina sem getur komið í veg fyrir það.

„Árið 2007 var metár hvað hjónavígslur varðar á Íslandi en þá lentu alls 1.797 pör í hjónabandi. Hjónaband er eins og tifandi tímasprengja. Það mun á endanum valda miklum harmi, sorg og eftirsjá, þegar maki deyr frá sálufélaga sínum. Nema fólk verði það heppið að heimilisofbeldi, framhjáhald eða ósættanlegur ágreiningur verði þess valdandi að hjónabandið endi með blóðugum skilnaði.“ Þetta kemur fram í skýrslu Velferðarráðuneytisins um stöðu og þróun jafnréttismála síðustu ár.

Árið 2011 urðu 516 lögskilnaðir á Íslandi og þó því beri að fagna er áhyggjuefni að þessi tíðni hefur nokkurn veginn staðið í stað í 25 ár. Í skýrslunni segir að taka þurfi spor í þau átt að auka skilnaðartíðni og vinna markvisst að því að útrýma þeim ranghugmyndum sem fólk hefur um hjónabandið.

Draga þarf úr vilja ungs fólks til að festa sig bæði félagslega og fjárhagslega með einhverju fífli sem verður bara meira óþolandi eftir því sem árin líða og veldur manni loks það miklum leiðindum að maður hreinlega drepst úr þeim.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  en hún hefur ekki fundið þann eina rétta ennþá.