Sannleikurinn: Sigmundur sennilega að ljúga því að stjórnarandstaðan muni ljúga

Haustfundur miðstjórnar Framsóknarflokksins fór fram á Selfossi um helgina. Þar sagði Sigmundur Davíð Gunnlaugsson forsætisráðherra, sem margsaga hefur orðið um menntun sína, flutti lögheimili sitt á eitthvað eyðibýli úti á landi til komast inn á þing og lofaði skuldaleiðréttingum fyrir kosningar án þess að hafa hugmynd um hvernig ætti að framkvæma slíkt, að stjórnarandstaðan væri svo ósvífin að ljúga.

Sigmundur sagði: „Stjórnarandstaðan er svo hræðilega svekkt með úrslit þingkosninganna í vor að hún hikar ekki við að gerast svo ósvífin að ljúga.“

„Það mun byrja með því að sagt verður ósatt um hvað við erum að kynna. Ástæðan fyrir að ég fullyrði þetta er að ég hef séð þetta á undanförnum mánuðum hjá þessari nýju stjórnarandstöðu sem er svo hræðilega svekkt yfir niðurstöðum kosninganna að þau bara geta ekki sætt sig við raunveruleikann. Og eru þess vegna tiltölulega ófeimin, ósvífin jafnvel, við að segja hreinlega ósatt. Við höfum rekið okkur á þetta aftur og aftur. Eitthvað er fullyrt sem bara stenst enga skoðun,“ sagði æðsti prestur fullyrðinga sem standast enga skoðun.

Gert er þó ráð fyrir því að starfshópur Sigmundar um skuldaniðurfellingarnar skili af sér tillögum í næstu viku. Það er starfshópurinn sem fékk það skemmtilega verkefni að finna einhverja leið til að framkvæma loforð Framsóknarflokksins þegar ljóst var að flokkurinn þyrfti að efna þau.

Samkvæmt Sigmundi verður útfærslan blanda af skuldaniðurfellingu Framsóknar og aðgerðum í gegnum skattkerfið líkt og Sjálfstæðisflokkurinn lagði til. En hann varar við að reynt verði að afvegaleiða umræðuna, ljúga, svíkja og pretta og það gæti náð því stigi að erfitt væri að sjá út í umræðunni hver væri framsóknarmaður og hver ekki.





Sannleikurinn rekur öfluga og óvæga fréttastofu þar sem engum er hlíft og sannleikurinn skiptir ekki höfuðmáli. Sannleikurinn er háður öllum stjórnmálaflokkum og hagsmunaaðilum um fréttaefni sitt. Fréttastofa Sannleikans hefur Facebook-síðu  þar sem allt sem þú lest er lygi.