Frábært útspil Lexus

Þeir sem prófa hinn nýja Lexus IS 300h bíl hljóta að velta því mikið fyrir sér hvernig hægt sé að búa til svo kraftmikinn lúxusbíl sem þennan sem eyðir minna en 6 lítrum á hundraðið við átakamikinn akstur. Þar að auki er hann hreinræktaður lúxusbíll sem fer ótrúlega vel með farþega og troðinn af góðgæti. Rúsínan í pylsuendanum er svo það að bíllinn kostar innan við 7 milljónir króna.

Lexus IS 300h er Hybrid bíll  eins og svo margir aðrir bílar Lexus öndvert við IS 250 sem hefur verið í boði á undanförnum árum og verður það áfram. Lexus IS línan er sú minnsta frá Lexus, lúxusbílaarmi Toyota. Langt er þó frá því að Lexus IS 300h sé smár bíll, en hann er 8 cm lengri en IS 250 og 1 cm breiðari og hjólhafið hefur lengst um 7 cm sem allt nýtist í aukið aftursætisrými.

Ytra útlit þessa nýja IS bíls er sérlega laglegt og ekki fer hjá því að þar fari fallegasti bíll Lexus í bili. Hliðarsvipurinn er bæði glæsilegur og sportlegur og mjög afgerandi uppsveigð lína frá síls og aftureftir bílnum gefur honum mikinn karakter. Framendinn er mjög grimmur og flottur og ber mikinn svip fá Lexus LFA ofurbílnum með snældulaga grillinu. Lexus hefur tekið rækilega til í hönnunardeild sinni og nýjustu bílar fyrirtækisins bera vitni um djörfung og þor og veitti reyndar ekki af. Bílar Lexus bera allt í einu meira vitni framúrstefnu en bílar helstu samkeppnisaðilanna frá Þýskalandi. 

Liggur eins og klessa

Það er ávallt nokkuð mögnuð tilfinning að leggja af stað í bíl sem er algerlega hljóðlaus, en bíllinn leggur ávallt af stað á rafmagninu einu saman og ef ekki er stigið á bensíngjöfina af þess meira afli má aka glettilega langt á því þangað til vélin kemur til kastanna. Samtals býr Lexus IS 300h að 223 hestöflum, 181 þeirra frá 2,5 lítra bensínvélinni, en restinni frá rafgeymum bílsins. Fyrir vikið er hann snarpur bíll sem gaman er að gefa inn. Hann er 8,3 sekúndur í hundraðið, þó tilfinningin sé sú að hann sé fljótari. Nægt afl er ávallt til staðar og fyrir vikið er ákaflega gaman að leika sér á bílnum.

Það sem gerir þann leik enn skemmtilegri er frábær fjöðrun bílsins og það má leggja mikið á þennan bíl í akstri. Hann liggur alltaf eins og klessa og fágun er fyrsta orðið sem kemur upp í hugann við akstur þessa bíls. Eins og góðum akstursbíl sæmir er bíllinn afturhjóladrifinn, en hrikalega erfitt er missa grip á honum og kom slíkt aldrei til þó lögmálum væri storkað.

Rafstýrð, stiglaus CVT-skiptingin hefur bæði kosti og ókosti. Kostur hennar kemur í ljós þegar lítið er átt við bensíngjöfina, en þá finnst eingfaldlega ekki fyrir skiptingum og hún er algerlega hljóðlaus. Ókostur hennar kemur hinsvegar í ljós þegar gefið er í, en þá virkar hún of sein og aflið skilar sér seint. Bæði frá kyrrstöðu og þegar bíllinn er botnaður á ferð verður talsverð bið eftir aflinu og telst það meðal fárra ókosta við bílinn. 

Fáránlega lítil eyðsla