Norsk sombímynd á Sundance-hátíðina

„Þetta hefur gríðarlega mikla þýðingu fyrir verkefnið og það er mikil viðurkenning fyrir myndina að vera frumsýnd á einni stærstu kvikmyndahátíð heims,“ segir Ragnar Agnarsson, framleiðandi hjá framleiðslufyrirtækinu Sagafilm. Norska sombímyndin Dead Snow 2, sem heitir á frummálinu Død snø 2, verður frumsýnd á bandarísku kvikmyndahátíðinni Sundance í janúar en Sagafilm er meðframleiðandi myndarinnar.

Myndin var tekin upp á Íslandi í sumar og er framhald myndarinnar Dead Snow, Død snø, frá árinu 2009 sem sló rækilega í gegn og hefur verið seld til 73 landa. Velgengnin kom leikstjóra myndanna, Tommy Wirkola, á kortið og leikstýrði hann meðal annars Hollywood-myndinni Hansel & Gretel: Witch Hunters.

Ragnar og teymið hjá Sagafilm unnu náið með framleiðendum myndarinnar, norska fyrirtækinu Tappeluft, og útilokar Ragnar ekki nánara samstarf með fyrirtækinu.

„Það á eftir að koma í ljós hvort við vinnum meira saman. Við höfum hent hugmyndum á milli og rætt nánustu framtíð en það er ekkert sem ég get staðfest að svo stöddu.“