Tökur á Stjörnustríði hefjast í maí

Tökur hefjast á sjöundu Stjörnustríðsmyndinni í Pinewood-kvikmyndaverinu í maí. Þetta hafa framleiðendur myndarinnar staðfest, en henni er ætlað að vera fyrsti hluti í nýjum þríleik.

Myndin gerist þrjátíu árum eftir Return of the Jedi, sjötta kafla seríunnar (en þriðju myndinni í framleiðsluröðinni). Nú er greint frá því að þrír ungir leikarar muni fara með aðalhlutverk myndarinnar en áður stóð til að þau Carrie Fisher, Mark Hamill og Harrison Ford færu með stór hlutverk í myndinni.

Þau voru í aðalhlutverkum fyrstu þriggja myndanna en framleiðendurnir segja að eiga megi von á „kunnuglegum andlitum“ í nýju myndinni. Er þar líklega vísað til gamla gengisins. Fisher, Hamill og Ford hafa lengi verið orðuð við myndina en þó hefur ekkert fengist staðfest frá framleiðendunum.

Aðrir sem orðaðir eru við hlutverk í myndinni eru Benedict Cumberbatch, Lupita N'gongo og Girls-stjarnan Adam Driver, en sá síðastnefndi er talinn líklegur til að leika illmenni.

Leikstjórinn J.J. Abrams er að eigin sögn lítið spenntur fyrir að taka myndina í Bretlandi, þar sem Pinewood-kvikmyndaverið er staðsett, en hann hefur aldrei leikstýrt mynd annars staðar en í Los Angeles.

Star Wars: Episode VII verður frumsýnd þann 18. desember á næsta ári.