Rolling Stones aflýsa tónleikum vegna andláts L'Wren Scott

Öldungarnir í Rolling Stones hafa ákveðið að aflýsa fyrirhuguðum tónleikum í Perth í Ástralíu sem halda átti á miðvikudag. Ástæðan er andlát kærustu söngvarans Mick Jagger, L'Wren Scott, en hún fannst á heimili sínu í New York í gær.

Talið er víst að hún hafi framið sjálfsmorð. Scott var tæplega fimmtug og höfðu þau Jagger verið saman frá árinu 2001. Fjölmiðlar í Bandaríkjunum hafa gert að því skóna að Jagger hafi nýlega sagt Scott upp en talsmaður hans segir að það sé af og frá.