Stórlax á hitch úr Ytri Rangá

Það hefur alltaf verið sagt að eina leiðin til að veiða vel í Ytri Rangá sé að nota þungar túpur, sökktauma og veiða djúpt en annað er nú að koma í ljós.

Erlendir veiðimenn sem sækja ánna heim eru margir hverjir að nota bara flotlínu og veiða ekkert síður en hinir sem veiða á þungu túpurnar og gera það sem oft er kallað að "skrapa botninn".  Nú nýlega veiddist meira að segja 90 sm fiskur á hitch í Hrafnatóftum og sá staður þykir nú ekki einn besti staðurinn í ánni til að hitcha.  Fleiri laxar hafa gefið sig með þessari aðferð og núna þegar sólardagar eru í vændum getur þessi aðferð oft verið betri en annað.  Staðir sem þykja henta afskaplega vel í Ytri til að hitcha eru t.d. Djúpós, Rangárflúðir, Hellisey, Tjarnarbreiða og svo sérstaklega Klöpp en sá staður er eins og hannaður fyrir hitch.  Straumurinn er nógu hraður og þungur til að gefa flugunni fallega yfirferð yfir tökustaðinn sem oft er ansi nærri landi og þegar laxinn tekur þarna fer hann annað hvort upp á fossbreiðuna eða niður í víkina fyrir neðan klöppina.  Hvprt heldur sem er þá fær fiskurinn gott rými og fínan straum til að gera viðureignina skemmtilega fyrir veiðimanninn.  Annað sem má líka benda mönnum á sem eru á leið í Ytri Rangá á næstunni er að minnka flugurnar, án gríns þá er það oft bara betra.  Og ekki gleyma að prófa Bomber.  Þú átt aldrei eftir að gleyma því að setja í lax á eina slíka!