„Þetta var það flottasta sem maður hefur séð hér á Íslandi"

„Þetta var alveg á heimsmælikvarða,“ sagði Bjarni Benediksson fjármálaráðherra eftir tónleikana með Justin Timberlake í kvöld. Bjarni var mættur á svæðið með fjölskyldunni. Um sautján þúsund manns hlustuðu á bandaríska hjartaknúsarann í rúman einn og hálfa tíma í kvöld.

„Við fjölskyldan höfum áður farið á tónleika með þessum listamanni og ég get sagt alveg eins og er að þessir tónleikar í kvöld voru meiri upplifun. Ég held að það hafi gert mjög mikið að hlusta á hann í lokaðri tónleikahöll,“ segir Bjarni sem fór áður á tónleika með Timberlake á Parken í Kaupmannahöfn.

„Yngri krakkarnir í fjölskyldunni eru kannski meiri aðdáendur en við vorum mætt fimm saman hér í kvöld.“

Bjarni segir að svona tónleikar hafi aldrei áður verið haldnir hér á landi.

„Þetta var það flottasta sem maður hefur séð hér á Íslandi. Þetta var æðislegt og maður sá greinilega að það voru allir að skemmta sér konunglega.“