GusGus byrjuð: Salurinn að fyllast

Töluverður kliður er í salnum í Kórnum þar sem GusGus hóf leik upp úr klukkan hálf átta. Íslenska hljómsveitin á að koma gestum í gírinn áður en Justin Timberlake stígur á stokk klukkan 21.

Ólíkt því sem ætla mætti þegar svo margir koma saman er ekki mikill hiti í salnum heldur nokkuð svalt. Fólk er að koma sér fyrir og hafa meðlimir GusGus beðið fólk um að hagræða staðsetningu sinni svo að allt plássið nýtist sem best. Þannig er að mun fleiri gestir eru í þeim hluta salarins þar sem hleypt er inn. Fyrir vikið er töluvert af ónýttu plássi á hinum endanum.

Þónokkur röð er fyrir utan Kórinn. Bílastæðið næst Kórnum, þar sem þeir máttu leggja sem komu fjórir eða fleiri saman á tónleikana, er þó ekki enn orðið fullt. Lýsti tónleikagestur því fyrir blaðamanni Vísis á staðnum að honum og þremur öðrum, sem saman voru í bíl, hefði verið skipað að leggja annars staðar en í þau stæði.

Vísir minnir á að hægt er að horfa á tónleikana í beinni útsendingu, þ.e. frá því Justin Timberlake stígur á svið klukkan 21. Nánar um það hér.