Stærstu tónleikar sem haldnir hafa verið

Tónleikagestir voru mættir löngu áður en húsið opnaði klukkan 18 í dag en tónleikar Timberlake hefjast klukkan 21 eftir tvö upphitunaratriði. Takmarkanir á umferð í Kórahverfinu tóku gildi klukkan 16 og sætaferðir með Strætó hófust um leið sem margir nýttu sér.  

Gríðarleg stemning er í Kórnum og hefur Vísir rætt við fjölmarga spennta gesti. Þá birta margir skemmtilegar myndir frá svæðinu. Tónleikarir verða í beinni útsendingu, nánar um það hér.

Ótrúlega spenna 

Gestir verða hvorki meira né minna en tæplega 17 þúsund og er von á gríðarlega mikilli upplifun á þeirri sýningu sem Timberlake lofar aðdáendum sínum, segir Ísleifur B Þórhallsson tónleikahaldari.

„Fólk á bara eftir að upplifa tónleika sem hafa ekki áður verið svona, þetta tekur tónleikahald á Íslandi upp á nýtt stig held ég”, sagði Ísleifur í fréttum Stöðvar tvö í kvöld.

„Það er sjaldan sem það hefur komið svona svakaleg stórstjarna hingað á hátindi ferils síns.  Fólk er búið að bíða með miðana í marga mánuði en það verð uppselt á korteri. Það er ótruleg spenna hér allt í kring”, sagði Ísleifur þegar einn og hálfur klukkutími var í að húsið opnaði en gestir teknir að streyma að. 

Þurftu næstum allar græjur landsins 

„Ég held að það sé alveg á hreinu að þetta eru umfangsmestu tónleikar sem haldnir hafa verið hér á landi. Hann er þannig listamaður að það eru miklar græjur og umstang sem fylgir honum varðani ljós, hljóð og sviðið. Við eiginlega hreinsuðum upp allar græjur í landinu og hann sjálfur kom með 18 tonn ofaná það”, bætir Ísleifur við en Kórinn sem er eitt stærsta hús landsins er notað til stórtónleika í fyrsta sinn. 

Á hápunkti ferilsins 

Fyrstu tvær sólóplötur Justin Timberlake sem komu út 2002 og 2006 seldust yfir sjö milljónir um alla heim og þar með stimplaði hann sig inn sem einn af farsælustu söngvurum 21.aldarinnar.  Síðan þá hefur hann rakað til sín viðurkenningum, meðal annars níu Grammy verðlaunum og fjórum Emmy verðlaunum.  

Umsvifamikill 

Timberlake, sem er 33ja ára hann hefur líka getið sér gott orð sem kvikmyndleikari og lék til dæmis stórt hlutverk í nýjustu kvikmynd Cohen bræðra Inside Llewyn Davis. Einnig má sjá Timberlake í myndum á borð við The Social Network, Friends With Benefits og Bad Teacher. Hann er umsvifamikill í viðskiptum og rekur sitt eigið útfágufyrirtæki, Tennman Records og selur sína eigin fatalínu undir nafninu William Rast.   Þá rekur hann nokkra veitingastaði í Bandaríkjunum. Að auki fer hann fyrir ýmis konar góðgerðarstarfsemi, svo sem í náttúruvernd. Samstarf hans við Madonnu, Jay-Z, Janet Jackson og fleiri risanöfn í tónlistarheiminum er þekkt.