5 leiðir til þess að ná stjórn á sykurlöngun

Við á Heilsuvísi viljum stuðla að bættri heilsu og betra líferni og skorum á þig að taka þátt í Sykurlausum september. 

Átakið fer þannig fram að þú átt eftir bestu getu að sneiða framhjá viðbættum sykri út september. Heilsuvísir verður með góð ráð og greinar um hvernig þú getur sneitt framhjá sykri allan september.

Hér koma fimm ráð sem geta hjálpað til í baráttunni við sykurpúkann.

1. Borðaðu próteinríkan morgunverð

Byrjaðu daginn á hollum og próteinríkum morgunverði. Það getur hjálpað til við að halda blóðsykrinum í jafnvægi yfir daginn.



2. Borðaðu reglulega og fáðu holla fitu úr matnum

Það er mikilvægt að verða aldrei of svangur, þá getur komið ójafnvægi á blóðsykurinn og þá er líklegra að við grípum í einhverja óhollustu. Borðaðu reglulega yfir daginn og borðaðu hollar fitusýrur. Holl fita hjálpar okkur að finnast við vera södd og þá leitum við síður í sætindi.

3. Slepptu gervisætunni

Jafnvel þó að gervisæta innihaldi engar kaloríur þá sýndi rannsókn frá Yale að vissar tegundir gervisætu geti aukið sykurlöngun hjá fólki. Gervisæta er þar að auki jafnvel óhollari en venjulegur sykur.

4. Fáðu nægan vökva

Stundum höldum við að við séum svöng þegar við erum í raun bara þyrst. Vökvatap stuðlar að líkamlegri vanlíðan og það er mikilvægt fyrir alla starfsemi líkamans að fá nægilegan vökva. Reyndu að drekka að minnsta kosti 8 vatnsglös á dag.

5. Prófaðu þig áfram með önnur krydd

Maturinn þarf ekki að vera bragðlaus þó að við sleppum sykrinum. Kanill er til dæmis frábær til þess að fá aðeins sætt bragð út á morgungrautinn og minta er mjög bragðgóð út í morgundjúsinn.

Heilsuvísir vill verðlauna þig
Við á Heilsuvísi viljum hvetja þig til góðra verka og drögum út heilsutengda vinninga vikulega í september. Vertu með á Facebook og Instagram og hastaggaðu #Heilsuvísir #sykurlausseptember. Myndirnar geta verið af hvatningarorðum, drykkjum, sykurlausum mataruppskriftum, sætum bitum án sykurs, fyrirmyndum og öllu sem að tengist ferðalagi þínu í sykurlausum september.