"Eiginmaður minn vissi ekki að við mæðgur yrðum með blómakransa“

Ellý Ármanns skrifar 18. júlí 2014 06:45

Áslaug Karlsdóttir giftist ástinni sinni Birki Árnasyni 7. júní síðastliðinn í blíðskaparveðri á Kirkjubæjarklaustri. Blómakransarnir sem Áslaug og dóttir þeirra báru á þessum mikilvæga degi í lífi þeirra vöktu athygli okkar.

Eins og sjá má á myndunum var höfuðskraut mæðgnanna sem Gyða Lóa Ólafsdóttir útbjó áberandi fallegt.

„Athöfnin var haldin í Prestbakkakirkju og að henni lokinni var slegið upp veislu í hlöðunni í Efri-Vík," segir Áslaug þegar tal okkar hefst um brúðkaupsdaginn.

Þessir blómakransar eru mjög fallegir - hvernig kom það til að þú ákvaðst að gifta þig með höfuðskraut? „Takk fyrir það. Ég er alveg einstaklega ánægð með þá. Fljótlega eftir að brúðkaupsundirbúningur hófst varð tölvan mín fyrir tilviljun full af myndum af bæði brúðum og brúðarmeyjum með blómakransa," segir Áslaug.

„Ég áttaði mig fljótlega á því að ég yrði að skarta blómakransi í brúðkaupinu mínu. Ég varð þess vegna himinlifandi þegar ég frétti að Gyða Lóa hafði reynslu af blómakransagerð og var hún svo yndisleg að gera kransa bæði fyrir mig og dóttur mina."

Brúðguminn vissi ekki af krönsunum

„Eiginmaður minn vissi ekki að við mæðgur yrðum með blómakransa en honum fannst þeir æðislegir og þá sérstaklega því þeir voru með ekta blómum."

Hér býr Gyða Lóa til blómakransa mæðgnanna. Hún notaði meðal annars Gleymmérei, Sóley og Maríustakk.

Spurð um blómakransana segir Áslaug: ,,Gyða Lóa notaði blómavír til þess að festa blómin. Hún notaði chrysa bæði í litlum og stórum stærðum ásamt því að tína sjálf blóm í garði móður sinnar og á svæðinu í kring þar sem brúðkaupið var haldið, til að mynda Sóleyjar, Gleymmérei og Maríustakk.

„Gyðu Lóu finnst sérstaklega gaman að nota blóm sem hún finnur út í náttúrunni með þeim sem hún kaupir í blómabúðum."

„Hún segir að það sé fullt af íslenskum blómum sem er vel hægt að nota og koma mjög vel út í svona blómakrönsum, þau eru mörg svo fíngerð og passa vel," segir Áslaug.