Segir ekki nei við nýjum tækifærum

Þetta hófst allt með því að ég ákvað að henda út sykri og hveiti þegar ég bauð tengdafjölskyldunni í mat,” segir Hafdís Priscilla Magnúsdóttir, sjúkraliði og þriggja barna móðir, en hún heldur úti sykur- og hveitilausa matarblogginu disukokur.is. “Það er bæði sykursýki eitt og tvö í fjölskyldu mannsins míns og sjálf er ég með vefjagigt. Ég finn talsverðan mun á mínum einkennum þegar ég tek út hveiti og sykur,” útskýrir Hafdís, en hún var hvött til þess að stofna blogg með uppskriftum sínum af Facebook vinum sínum, þar sem hún var dugleg að pósta uppskriftum sínum áður en hún stofnaði bloggið.

“Breytingarnar eru fyrst og fremst þær að ég finn mikinn mun á mínum verkjum. En svo finnst mér æðislegt að geta boðið upp á mat og bakkelsi sem ekki hefur áhrif á tannheilsu barna minna. Það er mikill kostur,” útskýrir Hafdís, en segist þó ekki heilög í þessum efnum. “Við fáum okkur alveg keyptan mat sem inniheldur þessa hluti og stundum laugardagsnammi en reynum að halda því í lágmarki.”

Bloggið hefur notið gífurlegra vinsælda en bókaútgáfan Óðinsauga hafði samband við Hafdísi í byrjun árs. “Þau höfðu rekist á bloggið mitt og spurðu hvort ég hefði áhuga á að gefa út uppskriftirnar mínar hjá þeim. Þar sem áramótaheitið mitt var að segja ekki nei við nýjum tækifærum ákvað ég að slá til,” segir Hafdís og hlær.

Bókin, sem heitir Dísukökur, inniheldur 100 uppskriftir, búðingar, kökur, konfekt, brauð, kex, sultur og allt þar á milli og allt hefur það sameiginlegt að vera án sykurs, hveitis og glútens. “Uppskriftirnar í bókinni henta vel þeim sem eru með sykursýki, glútenóþol og þeim sem eru á LKL en að sjálfsögðu öllum þar á milli sem vilja taka út sykur og hveiti úr mataræðinu en samt fá sér eitthvað ljúffengt,” segir hún að lokum.