Hættum að reyna við 20 punda klúbbinn

Það var og er draumur hvers veiðimanns að komast í hinn fámenna 20 punda klúbb með því að landa 20 punda laxi og brjóta þar með múrinn sem reynist mörgum erfiður.

Það liggur nefnilega töluvert heppni á bak við það að komast í þennan klúbb en þú getur auðvitað aukið líkurnar töluvert með því að veiða á svæðum þar sem stórlaxahlutfall er hátt og ef við gefum okkur það að þú sért reyndur veiðimaður þá er það eitt og sér líka eitthvað sem ætti að auka líkurnar.  Já, ef það væri bara svo gott.  En af hverju er þetta kallað 20 punda klúbburinn?  Miðað við það bætta siðferði hjá Íslenskum veiðimönnum og eins þá reglu í mörgum ánum að sleppa alltaf laxi yfir 70 sm þá eru ekki margir laxar, þótt stórir séu vigtaðir.  Það fer nefnilega ekki vel með laxinn að meðhöndla hann of mikið og veiðimenn fara afskaplega varlega með þessa dreka þegar þeim er landað til að fiskurinn bíði sem minnstan skaða af viðureigninni og fari aftur lifandi í ánna.

Það er því orðið ansi erfitt að vigta laxa svo vel sé og þar af leiðandi erfitt að færa sönnur á að um 20 punda fisk sé að ræða.  Þess vegna hefur það verið rætt milli veiðimanna að leggja þennan ágæta "20 punda klúbb" niður en byrja frekar að tala um 100 sm klúbbinn.  100 sm fiskur getur þó verið misþungur eftir því hvað hann er búinn að vera lengi í ánni og eins eftir því úr hvaða á hann kemur en að því gefnu að það er orðið erfitt að vigta laxa svo vel sé er þetta kannski það eina sem hægt er að gera.  Núverandi meðlimir "20 punda klúbbsins" halda auðvitað í heiðursorðurnar sínar en margir af þeim eldri í þessum hóp nutu verðlaunana með fengnum á brauði, í dag er þetta í besta falli flott mynd og frábær minning.