Ég hef engan tíma aflögu!

Margir kvarta undan því að hafa ekki tíma til þess að hreyfa sig. Það er bara einfaldlega of mikið að gera. Vekjaraklukkan er nú þegar stillt á 06.00 til þess að allir séu komnir út úr húsi og mættir í vinnu og skóla kl. 08.00.

Eftir það tekur vinnudagurinn við og svo skutlið í fótboltann, tónlistarskólann og búðaferðin að því loknu. Það þarf að hjálpa börnunum að gera heimavinnuna, elda matinn, þvo þvottinn og ganga frá. Þegar allir eru svo loksins sofnaðir er bara klukkutími þangað til þú þarft að vera komin upp í rúm svo þú vaknir nógu hress fyrir næsta dag og hann viltu nýta í ró og næði.

Hvernig í ósköpunum áttu að koma hreyfingu fyrir?

Notaðu hádegið

Það fá flestir, ef ekki allir, að minnsta kosti 30 mínútna hádegis­hlé. 30 mínútur eru nú ekki langur tími en það er ótrúlegt hversu miklu er hægt að koma fyrir á þeim tíma.

Taktu með þér hollt og gott nesti í stað þess að fara í mötuneytið og eyða öllu hléinu þar. Borðaðu nestið þitt og farðu síðan í 20 mínútna göngutúr eða gerðu æfingar á vinnustaðnum. Ég get næstum því lofað þér því að þú átt eftir að koma orkumeiri til baka í vinnuna heldur en eftir kjötbollurnar í mötuneytinu.

Talaðu við vinnuveitandann

Sumir vinnuveitendur eru farnir að taka upp á því að leyfa starfsfólki sínu að nýta hádegið, jafnvel sjálfan vinnutímann til þess að hreyfa sig.

Athugaðu hvernig málunum er háttað hjá þínu fyrirtæki og sjáðu hvort það sé ekki smuga fyrir örlitla hreyfingu, jafnvel hreyfingu á vinnustaðnum sem allir geta tekið þátt í. Það bæði eflir hópinn og styrkir starfsmennina.

Gerðu æfingarnar heima

Það eru allar líkur á því að það sé eitthvað á hverjum degi sem þú getur sleppt að gera heima hjá þér. Það gerist ekkert ef það er ekki búið um rúmið á hverjum degi eða ef sandurinn sem barnið ákvað að taka með sér heim í báðum skónum úr leikskólanum er ekki ryksugaður alveg strax. Hins vegar gæti heilsunni hrakað verulega ef þú hreyfir þig ekki.

Prófaðu að gefa þér 20-30 mínútur heima fyrir og gera æfingar. Þær þurfa ekki að vera flóknar og þú þarft ekkert að eiga til að gera hinar ýmsu æfingar. Ef þér detta engar æfingar í hug, athugaðu þá hvort þú getir ekki fengið æfingaáætlun hjá þjálfara sem þú getur gert heima hjá þér.

Fjölskyldan með í fjörið

Það er langskemmtilegast að hafa einhvern með sér þegar maður er að hreyfa sig og varla hægt að finna betri æfingafélaga en fjölskylduna. Ákveðið að fara í göngutúr eftir kvöldmat þrisvar sinnum í viku. Krakkarnir eiga eftir að koma þreyttir og glaðir heim og tilbúnir í svefn og þú átt ennþá þinn prívat tíma inni.

Hvað sem þú gerir, passaðu þig bara að það sé eitthvað. Ekki gera ekki neitt. Þá gæti komið að því að þú getir ekki lengur gert þá hluti sem þú elskar að gera.