Nostrar við hverja einustu jólagjöf

Hjúkrunarfræðingurinn Elva Björk Ragnarsdóttir leggur mikla rækt við þær jólagjafir sem hún gefur og ekki síst við það hvernig þær koma viðtakandanum fyrir sjónir. Yfirleitt eru pakkarnir fallega skreyttir og ekki óalgengt að pakkaskrautið sé gjöf í sjálfu sér.

Elva hefur mikla sköpunarþörf og tók upp á því að gefa aðeins heimagerðar gjafir í fyrra.

 „Upphaflega átti þetta að vera hagstætt en kom nú örugglega út á það sama og rúmlega það. Auk þess krafðist þetta mun meiri fyrirhafnar en að fara bara út í búð. Þetta var hins vegar mjög skemmtilegt og gefandi þó ég hafi verið orðin svolítið þreytt undir lokin,“ segir Elva sem gerði glasamottur og hitaplatta, armbönd og hálsmen og heklaði tuskur og slaufur svo eitthvað sé nefnt. Auk þess bjó hún til jólaskaut sem hún hengdi utan á hvern pakka.

Elva leggur sérstaklega mikið upp úr því að börnin sem hún gefur fái skemmtilega pakka og gefur hér nokkrar hugmyndir sem eru til þess fallnar að vekja gleði og kátínu.

Aðspurð segist hún ekki ætla að endurtaka leikinn frá því í fyrra. „Ég get þó örugglega ekki stillt mig um að gera eitthvað sjálf. Ég hef til dæmis verið að sauma barnaföt sem rata örugglega í einhverja pakka.“

Elva heldur úti heimilisblogginu verkefnivikunnar.com en þar er hægt að fylgjast með öllu því sem hún tekur sér fyrir hendur. Nýlega bætti hún við vefverslun með barnfötum og öðru sem sem hún gerir.