Þýski bílaframleiðandinn Borgward er í raun kínverskur

Á bílasýningunni í Frankfürt í haust kynnti þýski bílaframleiðandinn Borgward nýjan jeppling sem er grunsamlega líkur Audi Q5. Borgward átti sitt blómaskeið fyrir meira en hálfri öld síðan og fór svo á hausinn.

Borgward framleiddi bíla fyrir millistéttina en var nánast gleymt sem bílaframleiðandi þar til merkið var endurreist af kínverska bíla- og þungavélaframleiðandanum Foton. Foton á 100% í Borgward og ætlar greinilega að stytta sér leið inná evrópska bílamarkaðinn með þýsku bílamerki.

Borgward BX7 á að keppa við Audi Q5

Foton ætlar ekki að ráðast á garðinn þar sem hann er lægstur því fyrsti bíll þeirra er jepplingurinn Borgward BX7, sem keppa mun við Audi Q5 en verða talsvert ódýrari bíll. Það kemur svo sem ekki á óvart að fyrsti bíllinn er jepplingur en Foton framleiðir einmitt jepplinga í Kína. Á miðjum sjötta áratug síðustu aldar var næststærsti bílframleiðandi Þýskalands á eftir Volkswagen ekki BMW, Mercedes Benz, Audi eða Opel. Það var Borgward.

Það er sonarsonur stofnandans Carl Borgward, Christian, sem fer fyrir endurreisn bílamerkisins með fjármagni frá Kína og stuðningi Foton við smíðina. Í áætlunum Borgward hefst fjöldaframleiðsla hins fjórhjóladrifna BX7 um mitt næsta ár og fyrirtækið mun í kjölfarið kynna tvær nýjar bílgerðir á ári. Borgward hefur ekki enn fengist til að gefa upp verð BX7 en segir að það verði afara samkeppnishæft. Borgward BX7 á að vera tæknilega mjög vel útfærður og fullfær um að keppa við lúxusbíla eins og Audi Q5.

Ætla að framleiða 500.000 bíla á ári

Meiningin er að koma með bíla Borgward á markað í Evrópu eftir tvö ár en á meðan hasla sér völl í Kína. Framleiðslumarkmið Borgward er 500.000 bílar, nokkuð bratt í ljósi þess að heildarframleiðsla Borgward frá upphafi var um ein milljón bílar. Foton framleiðir nú þegar 650.000 bíla á ári.

Það virðist hafa verið mjög hugvitssamlegt að selja kínverska bílaframleiðandanum Foton allt hlutafé í Borgward því með því kemst bílamerkið inná kínverska markaðinn á þess að vera skattlagt sem innfluttir bílar. Það hefði annars tekið um 10 ár. Ennfremur eru vasar Foton djúpir og því nægt fjármagn til svo þróa megi nýja bíla án þess að eiga á hættu að verða fjárvana. Borgward hefur í huga að draga að nýja fjárfesta að Borgward og með því tryggja enn meira þróunarfé.

Borgward Isabella var framleiddur í 200.000 eintökum

Frægasti bíll Borgward var án vafa Isabella sem framleidd var í 200.000 eintökum frá árinu 1954. Hann þótti einstakur bíll, var með sjálfstæða fjöðrun á öllum hjólum, afar góðar bremsur, vó undir einu tonni en tók samt 6 farþega. Hann þótti frábær akstursbíll og átti ekki í vandræðum með að taka snarpar beygjur á mikilli ferð. Auk þess var hann vel útbúinn og sló nærri lúxusbílum.

Borgward Isabella var seldur í Bandaríkjunum og þar mátti fá bílinn á 1.600 dollara. Vel með farin eintök af bílnum seljast nú þar á 50.000 dollara og þykja mikil söfnunareintök. Haft er eftir þeim sem aka Borgward Isabella í dag að þar fari bíll sem ekur eins og nútímabíll, svo eitthvað hefur Borgward gert rétt með smíði þessa bíls og segja má að hann hafi verið bíll á undan sinni framtíð. 

Stofnandinn með bílablóð í æðum en lítill fjármálamaður

Stofnandinn, Carl Borgward, fór sínar eigin leiðir og sagt var að hann hefði verið sinn versti óvinur. Hann var með bílablóð í æðunum en lítill fjármálamaður og þegar erfiðir tímar komu árið 1961 urðu bankastofnanir fráhverfir stuðningi við Borgward og fyrirtækið var í kjölfarið lýst gjaldþrota. Nú er ný saga að hefjast hjá Borgward og spennadi verður að sjá hvernig þróun þess verður á næstu árum undir forystu sonarsonar hans.