Bandaríkjaforseti gestur í grínþætti Jerry Seinfeld

Barack Obama Bandaríkjaforseti verður fyrsti gestur Jerry Seinfeld í sjöundu þáttaröð Comedians in Cars Getting Coffee, grínþáttaraðar þar sem Seinfeld sest upp í bíl með þekktum grínistum og kíkir með þeim á kaffihús. Þættirnir snúast fyrst og fremst um samræður Seinfeld og gestanna um hitt og þetta.

Mjög lítið er vitað um hvað fer fram á milli þeirra Seinfeld og Obama í þættinum, sem frumsýndur verður 30. desember næstkomandi. Stikla fyrir nýju þáttaröðina, sem sjá má hér fyrir neðan, endar á örstuttu broti úr símtali þar sem Seinfeld hringir í Hvíta húsið og fær að vita að hann er að tala við forsetann.

Will Ferrell og Steve Martin verða einnig meðal gesta í nýju þáttaröðinni.