Sigurvegari í WOW Cyclothon: „Ætli ég byrji ekki á því að reyna ná þessari kampavínslykt af mér“

„Mér líður bara ágætlega, svolítið þreyttur en það er rosalega gaman að vinna svona keppni,“ segir Hafsteinn Ægir Geirsson en Örninn TREK kom fyrstur liða í mark í WOW Cyclothon keppninni. Liðið hafði betur á lokasprettinum gegn HFR Ungliðum. Liðið kom í mark á nýju meti á 36 klukkustundum og 53 mínútum.

„Við vorum auðvitað tíu, en vegalengdin var lengri. Ég veit ekki, sennilega voru veðuraðstæður hagstæðar og hópurinn var sterkur og staðráðinn í því að klára þetta á góðum tíma.“

Hægt er að horfa á beina útsendingu frá keppninni á Stöð 2 Sport og á Vísi með því að smella hér.

Hafsteinn er nýstiginn upp úr meiðslum og hefur ekki hjólað í fimm mánuði.

„Já, ég var látinn keyra rosalega mikið, óþarflega mikið. Til að byrja með fann ég fyrir þessu og það var vont að sitja kyrr inni í húsbílnum, á hjólinu var þetta allt í lagi. Núna ætla ég að hugsa um að koma mér í almennilegt stand og síðan mætum við aftur á næsta ári og bætum þennan tíma enn meira.“

Sjá einnig: Lengsta og flóknasta beina útsendingin á Íslandi frá upphafi

Gamla metið var sett í fyrra en það var 40 klukkustundir og 36 mínútur. Bæði liðin kepptu í 10 manna liðum. En hvað ætlar Hafsteinn að gera eftir þessa hringferð?

„Ætli ég byrji ekki á því að reyna ná þessari kampavínslykt af mér með því að fara í góða sturtu. Síðan þurfum við að ganga frá húsbílnum sem er eins og góða svínastía. Því næst ætla ég að slaka á og njóta þess að hafa unnið þetta.“

Hér að neðan má sjá myndband af því þegar Örninn Trek kom í mark og viðtalið við Hafstein.