„Það munaði hálfu stigi eða 0,24 sekúndum eftir því hvernig þú vilt líta á það,“ segir Andri Reyr sem líkt og Einar Magnús er afar spenntur. Þeir félagar snæddu síðast með Hafþóri, betur þekktum sem Fjallinu af aðdáendum Game of Thrones utan landsteinanna, í gær. Var afar góður andi yfir hópnum en þeim félögum er tíðrætt um 'anda'.
„Í okkar hópi þurfa menn að vera í rosalega góðum anda,“ segir Andri Reyr. Þegar menn séu í góðum anda geri þeir hluti sem venjulegt fólk samþykki einfaldlega ekki að sé hægt. Einar rifjar upp stutta sögu til útskýringar frá æfingu í Jakabóli. Hann sé ekki jafnsterkur og flestir strákarnir sem lyfti í Jakabóli og var í þessu tilfelli gert grín að þyngdunum sem hann var að taka.
„„Það skiptir ekki neinu helvítis máli hvað maður lyftir þungu. Það er bara vera í anda,“ segir Einar og hlær. Þögn hafi skollið á hópinn og allir samþykkt svarið.
„Við ætlum að vera í miklum anda í Malasíu,“ segir Einar.
Aðspurðir segja þeir félagar ástæðuna fyrir ferðalagi sínu einfalda. Þeir ætli að styðja sinn vin og halda utan um hann á meðan hann stendur í ströngu í keppninni. Aðspurðir um möguleika Hafþórs segir Andri:
„Ef allt gengur upp þá tekur hann titilinn.“
Riðlakeppni hefst á laugardaginn og stendur í fjóra daga. Reikna þeir með því að Hafþór muni eiga greiða leið í úrslitin sem fara fram aðra helgi. Þar muni keppnin að óbreyttu standa á milli Hafþórs, Bandaríkjamannsins Brian Shaw og Litháans Zydrunas Savickas sem á titil að verja eftir baráttuna við Hafþór í fyrra.
Sjá einnig:„Alveg grátlegt því það munaði svo litlu“
Aðspurðir hvort árið hefði verið lengi að líða eftir svekkelsið í fyrra segir Andri svo ekki vera. Hafþór hafi verið mjög fljótur að jafna sig.
„Hann notaði þetta bara sem hvatningu. Til að efla sjálfan sig í því að koma tilbaka,“ segir Andri. Einar bætir við að hann hafi strax ákveðið að ætla að vinna keppnina að ári.
„Andri var hins vegar brjálaður í tvær vikur,“ segir Einar og hlær. Andri hristir hausinn. „Já, ég var trylltur úti!“
Húðflúr skipa oftar en ekki stóran sess hjá kraftajötnum. Hafþór, Andri og Einar eru engin undantekning. Skemmst er frá að segja að þeir félagar lofuðu Hafþóri báðum að skella húðflúri á kálfann sinn myndi hann landa titlinum í ár. Einar tók svo forskot á sæluna.
„Þetta kom upp í einum 'anda'-hádegisverði,“ segir Einar. Þeir snæði reglulega sjö til átta saman og peppa Hafþór upp.
„Þá er yfirleitt tvöfaldur hamborgari á alla og Hafþór fær einn auka í desert.“
Um daginn kom svo til tals við hádegisverðinn hvort það væri ekki best að drífa húðflúrunina af. Einar segist hafa tekið vel í það enda hafi hann það mikla trú á Hafþóri. Þeir brunuðu til vinkonu Einars í Tattú og skart. Svo vel vildi til að hún átti lausan tíma og þá var ekki aftur snúið.
„Ég lagðist á magann og var kominn með logo-ið á kálfann á innan við klukkutíma,“ segir Einar og sýnir blaðamanni eðli málsins samkvæmt húðflúrið. Um er að ræða mynd af Hafþóri halda á nýþungum steini sem er eitt af merkjunum sem hann notar á bolina. Gangi allt eftir og Hafþór verður krýndur sterkasti maður heims ætlar Einar að láta breyta steininum í Atlas og hafa undirskrift Hafþórs neðan við merkið.
„Ég hef fullan trú á því að hann sé að fara að taka þetta,“ segir Einar. Hann bætir þó við, til vonar og vara, að hann verði burtséð frá því stoltur af því að eiga hann sem vin hvernig sem fari.
Aðspurður um hvaða breytingum húðflúrið mun taka vinni Hafþór ekki sigur segist Einar ekki tímabært að greina frá því. Hafþór sé í það minnsta ekki spenntur fyrir þeim breytingum.
En hvað segja betri helmingar þeirra félaga um þá ákvörðun að fá sér húðflúr af Hafþóri?
„Það er ekki spurt. Þetta er okkar líkami,“ segir Einar og hlær. Andri bendir á að hann sé nú þegar með húðflúr af konu sinni og börnum á handleggnum.
„Kærastan mín sagði að þetta væri bara töff!“ bætir Einar við.
Andri og Einar halda sem fyrr segir utan í nótt en framundan er sólarhringsferðalag til Kuala Lumpur. Þeir félagar verða með puttann á púlsinum fyrir Vísi og verður grannt fylgst með gangi mála hjá okkar mönnum, þeim Benedikt og Hafþóri, í baráttu við sterkustu menn í heiminum.
