Hamingjuhleðsla

Ég skrifa mikið um kynlíf, það ætti að vera hverjum lesanda þessara pistla ljóst fyrir löngu. Ég fór samt að pæla í einu um daginn og það var hvað gerir einstakling aðlaðandi í augum annarra. Vissulega er hægt að tína til fatnað, hárgreiðslu og almenn smartheit en manneskja er raunverulega aðlaðandi þegar hún er innilega hamingjusöm, örugg og líður vel í umhverfi sínu. Það var þá sem það rann upp fyrir mér ljós, vinkonurnar! Því verður þessi litla lesning óður til vinskapar.

Ég er rík af vinkonum. Þær eru sterkar, sjálfstæðar, hreinskilnar, ákveðnar, fyndnar og einlægar. Þær eru alls konar og oftar en ekki í bullandi mótsögn við sjálfa sig í einu og sömu setningunni, en einmitt það skerpir á innileika vináttunnar, að fá að tala sjálfa sig í hring og reyna að komast að einhverri niðurstöðu. Eða ekki. Það er mikil lífsgleði fólgin í því að fá að byrja setningar á „æ stelpur, þið vitið hvað ég er klikkuð en ég var að spá…“. Það er fátt sem nærir hjartað mitt jafn mikið og að hitta vinkonur mínar. Að eiga með þeim smá stund þar sem við tölum um heimsins mál, tíðni sjálfsfróunar, píkuprump í jóga eða bara inngróna tánögl. Fá frí frá pressu heimsins, verða aftur bara áhyggjulaus unglingur og bara spjalla við vinkonur sínar, létta á sér, fá álit á málefnum líðandi stundar og kannski hlæja smá.

Og fegurðin. Mér líður oft eins og vinkonur mínar gangi með sérstaka lýsingu í kringum mig því fallegri manneskjur finnast varla. Það hreinlega geislar af þessum elskum. Það er ekki svo að þær séu eitthvað heilagri en aðrir, síður en svo. Þær eru bara hjarta mínu svo kærar að ég gæti ekki ímyndað mér lífið án þeirra. Ég hef engin sérstök áhugamál, stunda ekki íþróttir, prjóna hvorki né geng á fjöll en ég rækta vinkonur mínar. Ég passa að hringja í þær, heyra í þeim, tengjast.

Ég finn að ég kem endurnærð inn í mitt líf eftir að hafa rétt sett mig í samband við þær. Það að eiga góða vini er ómetanlegt, en rétt eins og með allt í lífinu þá þarf að leggja rækt við sambönd. Það þarf að teygja sig eftir fólki, hlusta og tala. Það að vera aðlaðandi er meira en bara ytra útlit, það er endurspeglun á hamingjusömu hjarta og gleðiglampa í auga. Taktu upp símann, hafðu samband og njóttu þess að hlaða hamingjuna.