Harry Bretaprins kom til bjargar í Lundúnamaraþoninu

Þetta var alveg ótrúlega mikil upplifun og mikil lífsreynsla – það var lifandi tónlist út um allt og mikil stemning. Þetta var í fyrsta skipti sem ég hljóp heilt maraþon, hlaupið gekk ótrúlega vel, maður fyllist ákveðnu stolti og á erfitt með að hætta að brosa,“ segir Dagný Fjóla Ómarsdóttir, markaðs- og alþjóðaviðskiptafræðingur en hún tók þátt í Lundúnamaraþoninu, sem fram fór um síðastliðna helgi.

Hlaupið fór fyrst fram árið 1981 og er eitt fjölmennasta maraþonhlaup heims ef tekið er tillit til þeirra sem luku hlaupinu en rúmlega 39.000 manns voru skráðir til þátttöku í ár. Um hálf milljón manns fylgist með keppninni en nú þegar hafa safnast rúmlega 3,8 milljarðar í góðgerðamál.

„Það var þvílíkt mikið um að vera í hlaupinu, lifandi tónlistaratriði ásamt fullt af alls konar karakterum sem hlupu í búningum. Fyrrverandi Ólympíu­fari hrundi niður af sviðinu en það var enginn annar en Harry prins sem kom henni til hjálpar, það hefði verið gaman að sjá hann. Svo var maður sem tók sér góða stund í að biðja konunnar sinnar í miðju hlaupinu,“ segir Dagný Fjóla og bætir við að þetta hafi verið einstök upplifun.

Það er óhætt að segja að undirbúningur fyrir heilt maraþon sé mikill og fólk þar að fylgja stífu prógrammi nokkrum vikum fyrir hlaupin

„Ég fylgdi prógrammi sem heitir Runkeeper, það hjálpaði mér mjög mjög. Ég hef aldrei áður hlaupið svona langa vegalengd, þar sem ekki er mælt með því að hlaupa heilt maraþon í undirbúningstímabilinu. Maður veit nánast ekki við hverju er að búast og hvort maður raunverulega geti þetta,“ segir Dagný Fjóla.

Dauðsfall varð í hlaupinu þegar her­for­ingi frá Skotlandi fékk hjarta­áfall er hann átti um fimm kíló­metra eft­ir í mark, hann var flutt­ur á spít­ala þar sem hann lést.

„Það var alveg ótrúlega sorglegt að heyra þessar fréttum rétt eftir að ég kom í mark. Vin­ir hans ætla að ganga þá leið sem hann átti eft­ir af hlaup­inu, „til að ljúka því sem hann hóf“,“ segir Dagný að lokum.