Vöfflur og pönnsur á stuttermaboli

Fjórir félagar úr 10. bekk í Langholtsskóla hafa sett af stað verkefni til styrktar Downs félaginu á Íslandi. Þeir hanna og prenta myndir af morgunmat á stuttermaboli og kalla sig Dos Waffles á Facebook.



„Við erum allir í 10. bekk í Langholtsskóla og þetta er lokaverkefnið okkar. Við ákváðum að styrkja Downs félag Íslands og hanna og prenta boli til að selja. Allur ágóðinn rennur til félagsins,“ útskýrir Sveinn Guðnason sem ásamt þeim Andra Sævarssyni, Óla Brimari Þorleifssyni og Gunnlaugi Erni stendur í ströngu við að prenta myndir á stuttermaboli.

Þeir kalla sig Dos Waffles og hafa opnað Face­book-síðu með því nafni þar sem þeir taka við pöntunum.

Hvernig fór þetta af stað? „Við skoðuðum myndir á netinu og svo er einn okkar mjög góður í að teikna og á teiknispjald sem hann tengir við tölvuna. Við vorum búnir að redda díl við fyrirtæki sem prentar á boli en löbbuðum svo í einni nestispásunni í skólanum inn í Farva og hann gerði okkur frábært tilboð, að hann myndi kenna okkur allt svo við gætum gert bolina sjálfir. Við erum því komnir í hálfgert samstarf við Farva með verkefnið,“ segir Sveinn og bætir við að bolirnir fái góðar viðtökur.

„Við vorum að kynna verkefnið fyrir áttunda og níunda bekk í gær og fengum strax slatta af pöntunum. Þetta fer betur af stað en við bjuggumst við,“ segir Sveinn en þeir félagarnir kynntu verkefnið fyrir foreldrum í gærkvöldi á útskriftinni.

Hverslags myndir prýða bolina? „Þetta eru vöfflur, pönnukökur og maður að borða kleinuhringi. Morgunmatarþema,“ segir Sveinn en hefur engar skýringar á því af hverju matur varð fyrir valinu.

„Við eiginlega vitum það ekki. Við duttum bara niður á mynd af vöfflu þegar við vorum að byrja á verkefninu. Við ætlum að gera viskustykki líka og við prófuðum að gera eitt í Farva sem kom vel út. Svo ætlum við að bæta við svuntum og smekkjum með þessum myndum. Ef þetta gengur vel höldum við eitthvað áfram með þetta, það á allt eftir að koma í ljós. Við erum ekkert farnir að tala við búðirnar strax,“ segir hann sposkur.

„Kennarinn er allavega mjög ánægður með þetta.“

Nánar má forvitnast um verkefnið á Facebook-síðunni Dos Waffles.