Glæfraspil gítarleikarans fær hárin til að rísa á poppbransanum

Kristján Grétarsson, einn besti gítarleikari landsins, birti mynd af sér á Facebook-síðu sinni þar sem hann er í fallhlífastökki. Myndin sem tekin var í gær er háskaleg því himinhátt er til jarðar. Enda sýpur poppbransinn allur hveljur og lætur það berlega í ljós á síðu Kristjáns. Sjálfur Bo talar fyrir hönd margra þegar hann segir einfaldlega: „ooohhh“ og Jógvan Hansen spyr hvort ekki sé „alt í lagi heima hjá þer dreingur?“

Vísir náði tali af Kristjáni nú fyrir stundu, en hann er staddur ásamt bróður sínum og vini úti í Frakklandi – en ekki hvar?

„Já við skelltum okkur til Swiss svona fyrir fyrsta leik. Fórum til Lauterbrunnen sem er ótrúlegur staður og skelltum okkur þar í svona fallhlífarsvifstökk. Eitthvað sem allir ættu að prófa.“

Þú ert ekki mjög lofthræddur?

„Jú, ég skal alveg viðurkenna það að ég er mjög lofthræddur.“

Ha? Er hægt að fara í svona nokkuð lofthræddur?

„Jahhh, einhvernvegin hvarf það um leið og við hittum flugmennina okkar. Þeir virtust svo afslappaðir og auðvitað þaulvanir þessu að maður gleymdi hræðslunni. En vissulega risu hárin nokkrum sinnum í kláfunum á leiðinni þarna upp fjallið sem er þverhnípt í 1600 metra hæð.“

Og félagar þínir í bransanum súpa hveljur?

„Já ég skal alveg viðurkenna það að ég gerði það sjálfur þegar búið var að bóka þessa afþreyingu fyrir okkur í hópnum.“

Kristján og þeir þrír ætla að sjá alla leiki Íslands ásamt því að ferðast vítt og breitt um Frakkland. Og nú líður að leik og menn væntanlega að stressast upp?

„Ekkert stress hjá okkur, en vissulega spenntir. Sitjum í góðum gír hérna á knæpu í St.Etienne og förum að færa okkur fljótlega yfir á völlinn. Þetta snýst auðvitað bara um að njóta þessa ótrúlega augnabliks sem er að fara eiga sér stað hjá landsliðinu.“