Átti að vera stíf og klunnaleg á sviðinu

Hvað ætlar þú að gera í sumarfríinu, Aðalbjörg Emma? Ég ætla að æfa fimleika hjá Björk í Hafnarfirði og fara í Tómstund sem er í Öldunni, frístundaheimili Öldutúnsskóla, þar er hægt að velja um boltaleiki, Tómstund Got talent og Hár og skart. Svo fer ég örugglega í sumarbústaðinn með fjölskyldunni. Kannski að veiða. Einu sinni fór ég með pabba, afa og langafa að veiða.

Áttu systkini? Já, tvö, stóra systur sem er að verða nítján ára og lítinn bróður sem er að verða þriggja ára. Ég er stundum að passa hann á trampólínunu í garðinum. Það er grafið niður í jörðina og því þarf ekki að vera net í kring.

Við hverja leikur þú þér helst?  Hörpu og Öldu, nágranna mína. Önnur er að verða átta ára og hin að verða tólf. Svo á ég aðrar bestu vinkonur, Örnu og Arndísi. Ég er líka með tveimur stelpum í fimleikum og skóla, þær heita Ísabella og Cindy og þær eru skemmtilegar.



Hvað langar þig að verða? Leikkona. Ég var að leika í Billy Elliot í eitt ár, það var dálítið erfitt en líka mjög gaman. Ég missti ekki af neinni sýningu. Ég var ein ballettstelpunum. Þetta var ekki alvöru ballett því við áttum ekki að gera fallegar og mjúkar hreyfingar heldur vera stífar og klunnalegar. En vorum samt kófsveittar þegar við komum út af sviðinu.

Ég lék fyrst þegar ég var sjö ára í myndinni Sumarbörnin, það er ekki enn búið að frumsýna hana og fyrir stuttu lék ég í Arionbanka auglýsingu.

 

Greinin birtist fyrst í Fréttablaðinu 16. júní  2016.