Aukin pressa sem fylgir Skaupinu

Allir hafa skoðun á Áramótaskaupinu og eru skoðanirnar nánast jafn misjafnar og þær eru margar. Fréttablaðið tók nokkra aðstandendur þess tali og kannaði hvernig þeim þykja viðbrögðin hafa verið.

Var á Twitter allan tímann

„Skaupið er sérstakt fyrirbæri, ég held að það tíðkist ekki annars staðar að það sé sýndur grínþáttur einu sinni á ári sem 90 prósent þjóðarinnar horfir á og það hafa allir mjög sterkar skoðanir á honum. Þetta er mjög erfitt verkefni og það er rosalega erfitt að höfða til allra. Þetta grín sem á að henta öllum er ákveðin formúla af gríni sem er mikill óvinur grínista. Það er ekki hægt að búa til fullkomið skaup en einhvern tímann var talað um að takist þér að hlæja kannski þrisvar sinnum upphátt yfir skaupinu þá hafi það gengið vel, ég er nú ekki alveg sammála því og vona að fólk hafi almennt hlegið örlítið meira en það. Þetta er rosalega vanþakklátt og fólk er að vinna miklu meira en það er kannski að fá borgað fyrir,“ segir Steindi Jr. grínisti en hann bæði lék og var einn handritshöfunda.

Steindi sökkti sér ofan í samfélagsmiðla eftir skaupið. „Að sjálfsögðu á maður að slökkva á samfélagsmiðlunum á gamlárskvöld en ég var á Twitter allt skaupið. Klukkan tólf var kærastan mín sífellt að segja mér að koma fram og vera með fólkinu en ég var í svona klukkutíma eftir skaup lokaður inni í herbergi að skoða viðbrögð á samfélagsmiðlunum. Mér fannst flestir jákvæðir en auðvitað er þetta ekki fyrir alla. Ég held samt að þetta hafi verið vel heppnað skaup en held þó að elsta fólkið hafa átt erfiðast með að skilja þetta.

Persónulega finnur maður minnst fyrir neikvæðninni því það fólk sem talar beint við mann er yfirleitt frekar jákvætt. Annars byrja ég öll samtöl þessa dagana á; Hefur þú heyrt eitthvað neikvætt? og sendi kærustuna mína í vettvangsferð til að hlera og kanna viðbrögð. En ég geng mjög sáttur frá borði, það auðveldar manni þegar maður hittir fýlupúka úti í bæ að maður sé sjálfur sáttur. Mér finnst Kristófer Dignus leikstjóri eiga mikið hrós skilið, hann hélt vel utan um þetta og gerði þetta vel,“ útskýrir Steindi.

Hann segist finna fyrir aukinni pressu sem fylgi skaupinu. „Ef ég fer og geri eitthvað sjálfur, þá er það mitt stöff og þá er það bara þeir sem kjósa að horfa á það sem horfa. Skaupið er eitthvað sem allir eru að horfa á. Þú þarft að finna fersk teik á öllum málum, þarft að reyna koma fólki á óvart en á sama tíma að finna línu sem hentar sem flestum. Ég var bara hálfpartinn á bak við sófa að horfa á þetta,“ segir Steindi og hlær.