52 fiskar á land í Köldukvísl í fyrradag

Kaldakvisl er eitt af þeim veiðisvæðum sem of fáir hafa kynnst og veitt en í ánni má finna bleikjustofn sem verður oft ansi stór.

Veiðin í ánni getur oft verið ævintýralega góð og sem dæmi um það veiddust 50 bleikjur og 2 urriðar í ánni í fyrradag og þar af nokkrar rígvænar bleikjur.  Það eru strákarnir hjá Fish Partner sem halda utan um sölu á leyfum í Köldukvísl og það er óhætt að segja að þeir séu ánægðir með gang mála þessa dagana.

"Það komu 50 bleikjur komu á land og 2 urriðar á 3 stangir.  Þetta var mest á bilinu 40-50cm en nokkrar kusur voru innan um sem fóru yfir 60cm.  Sjálfur skrapp ég uppí Fagrafoss og fékk einn 55 cm. urriða í fyrsta kasti. Tók ekki fleiri köst því ég fór aðeins til að athuga hvort að væri orðið fært innúr en það er bara fært vel útbúnum jeppum. Það er klárt að þeir eiga von á góðu á næstu dögum í Köldukvíslinni" sagði Kristján Páll Rafnsson hjá Fishpartner í samtali við Veiðivísi í gærkvöldi.  Tungnaáin, sem einnig er hluti af þessu svæði er á yfirfalli og ekkert hægt að veiða hana á meðan ástandið er þannig.

Af öðrum svæðum hjá Fish Partner er það að frétta að frábær veiði hefur verið á svæðum Villingavatns undanfarna daga en 28 stykki veiddust í gær í Ósnum sjálfum. Einnig hafa menn verið að fá góða veiði á B svæðinu sem er svæði á milli villingavatnsárós og Hellisvíkur.  Kropp hefur verið á Kárastöðum og Svörtuklettum en engin skot hafa dottið inn þar undanfarna daga.