Tölfræðin sem grætir stuðningsmenn Liverpool

Árið 2017 hefur ekki verið gott fyrir Liverpool og 1-0 sigurinn á Manchester City á Gamlársdag var enginn fyrirboði þess sem tæki við á nýju ári.

Liverpool hefur tapað tólf stigum í fyrstu fimm deildarleikjum ársins og hefur jafnframt dottið út úr báðum bikarkeppnunum. Liðið er nú þrettán stigum á eftir toppliði Chelsea og Manchester United vantar líka aðeins eitt stig til að komast upp fyrir erkifjendur sína.

Knattspyrnustjórinn Jürgen Klopp leit út eins og bugaður maður á lokamínútunum um síðustu helgi þegar Liverpool var komið 2-0 undir á móti Hull.

Hull vann leikinn á endanum 2-0 og hafði Liverpool þar með tapað tveimur leikjum á stuttum tíma á móti liðum í fallsæti því stuttu áður hafði Gylfi Þór Sigurðsson tryggt Swansea 3-2 sigur á Liverpool á Anfield.

Liverpool hefur fengið 3 stig í þessum fyrstu fimm leikjum ársins þar af tvö þeirra á móti liðum úr hópi þeirra sex efstu.

Liverpool getur verið afar ánægt með árangur sinn á móti sex bestu liðum deildarinnar en liðið hefur enn ekki tapað í innbyrðisleikjum toppliðanna en það er árangurinn á móti hinum fjórtán og þá sérstaklega neðri hlutanum sem grætir stuðningsmenn Liverpool.

Liverpool hefur tapað 18 stigum á móti neðstu fjórtán liðunum þar af sextán þeirra á móti 9 lélegustu liðum deildarinnar. Hér fyrir neðan má sjá yfirlit yfir töpuð stig Liverpool en viðkvæmir stuðningsmenn Liverpool eru varaðir við þessum lestri.



Sex bestu liðin í ensku úrvalsdeildinni og hvar þau tapa stigum

Í leikjum við sex bestu liðin

Liverpool 8

Chelsea 11

Manchester City 11

Tottenham 12

Manchester United 12

Arsenal 13

Í leikjum við liðin í sjöunda til tuttugasta sæti:

Chelsea 2

Tottenham 10

Manchester City 12

Arsenal 12

Manchester United 15

Liverpool 18



Stigin sem Liverpool hefur tapað á þessu tímabili

Á móti topp sex

1. Chelsea 2 (1-1 jafntefli á heimavelli)

2. Tottenham 2 (1-1 jafntefli á útivelli)

3. Man City - 0

4. Arsenal - 0

5. Liverpool

6. Man Utd 4 (0-0 jafntefli á heimavelli og 1-1 jafntefli á útivelli)

    

Á móti hinum fjórtán liðunum

7. Everton - 0

8. West Brom - 0

9. West Ham - 2 (2-2 jafntefli á heimavelli)

10. Watford - 0

11. Stoke - 0

12. Burnley - 3 (2-0 tap á útivelli)

13. Southampton - 2 (0-0 jafntefli á útiveli)

14. Bournemouth - 3 (4-3 tap á útivelli)

15. Middlesbrough - 0

16. Leicester - 0

17. Swansea - 3 (3-2 tap á heimavelli)

18. Hull - 3 (2-0 tap á útivelli)

19. Crystal Palace - 0

20. Sunderland - 2 (2-2 jafntefli á útivelli)