Örþreyttur Grímur sleikir sólina eftir álag undanfarinna vikna

Stefán Árni Pálsson skrifar 1. mars 2017 10:30

Grímur Grímsson sleikir sólina í sunnanverðri álfunni þessa dagana eftir annasamar vikur. Vísir/Anton Brink

Á sama tíma og snjórinn hefur gert sig heimankominn á höfuðborgarsvæðinu er fastagestur nokkur á sjónvarpsskjám, dagblöðum og vefsíðum landsins kominn í vetrarfrí. Maðurinn sem um ræðir er Grímur Grímsson yfirlögregluþjónn sem fer fyrir rannsókninni á hvarfi Birnu Brjánsdóttur. Samkvæmt heimildum fréttastofu er Grímur komin sunnar í álfuna þar sem sólin skín.

Líklega eru flestir sammála um að fríið hljóti að vera kærkomið enda verið mikið álag á Grími undanfarnar vikur eða allt frá því lögregla hóf rannsókn á málinu. Mynd sem birt var á Facebook-síðu Kastljóss í síðustu viku segir meira en mörg orð en þar sást Grímur fá sér nokkurra mínútna kríu áður en hann sat fyrir svörum í þætti kvöldsins.

Almennt má segja að mikil ánægja ríki meðal almennings með störf Gríms í fyrrnefndu máli. Hefur fólk kallað eftir því að hann verði sæmdur Fálkaorðu og aðrir segja að þar fari á ferð maður ársins.

Karl Steinar Valsson, náinn vinur og samstarfsmaður Gríms til margra ára hjá lögreglunni, lýsti Grími í viðtali við Fréttablaðið í janúar.

„Grímur er sá maður sem mér hefur ávallt þótt best og skemmtilegast að vinna með. Sterk fyrirmynd fyrir aðra lögreglumenn og langt út fyrir það. Þegar hann talar þá hlustar maður og veit að maður getur treyst því sem hann segir,“ segir Karl Steinar.

Þá lýsti Vigdís Grímsdóttir, systir Gríms og rithöfundur með meiru, Grími sem skemmtilegum litla bróður.

„Hann var æðislega skemmtilegur strákur og sífellt brosandi, kunni meðal annars þá list að spila glimrandi lög á tennisspaða, sem ég efast um að margir geti leikið eftir. Mikill gleðigjafi og húmoristi og eiginlega besti gæi í heimi, vildi alltaf öllum í húsinu vel og vill enn,“ segir Vigdís.

Mest lesið

Fleiri fréttir

Mest lesið

Fleiri fréttir

Mest lesið

Tarot dagsins