Choupo-Moting bjargaði stigi fyrir Stoke

Stoke og Manchester United skyldu jöfn 2-2 í lokaleik dagsins í enska boltanum en Eric Choupo-Moting skoraði bæði mörk Stoke í leiknum, hans fyrstu fyrir félagið.

Kom hann Stoke yfir af stuttu færi eftir góða fyrirgjöf undir lok fyrri hálfleiks en Marcus Rashford svaraði um hæl í uppbótartíma er skalli Paul Pogba fór af hnakka hans og í netið.

Romelu Lukaku kom gestunum yfir á 57. mínútu eftir frábæra sendingu frá Henrikh Mkhitaryan en Stoke-menn voru fljótir að svara. Var þar að verki Choupo-Moting með skalla eftir hornspyrnu Xherdan Shaqiri.

Reyndist það síðasta mark leiksins þrátt fyrir nokkrar ágætar tilraunir Manchester United en þetta voru fyrstu töpuðu stig tímabilsins hjá Manchester United.