Þúsundir lögðu á sig fjögurra tíma fjallgöngu til að sjá nýjustu Mission Impossible á toppi Predikunarstólsins

Þúsundir lögðu leið sína að Predikunarstólnum í Noregi til að vera viðstaddir forsýningu á sjöttu myndinni í Mission Impossible-kvikmyndaseríunni. Sjötta myndin heitir Fallout og skartar sem fyrr Tom Cruise í aðalhlutverki ásamt Henry Cavill, Simon Pegg, Rebeccu Ferguson, Alec Baldwin, Angelu Bassett og Ving Rhames. 

Athugið að þessi grein gæti spillt áhorfi þeirra sem eiga eftir að sjá myndina. Þeir sem vilja sjá myndina án þess að vita nokkuð um söguþráð hennar eru beðnir um að hætta lestri.

Síðasta áhættuatriðið í þessari mynd var tekið upp hjá Predikunarstólnum sem er stór klettur á norðurhlið Lysefjords í sveitarfélaginu Forsand.

Kletturinn er afar vinsæll á meðal ferðamanna en kvikmyndaverið Paramount, sem framleiðir Mission Impossible-myndirnar, ákvað að halda sérstaka sýningu á sjöttu myndinni á toppi klettsins, sem er í 610 metra hæð yfir sjávarmáli, til að þakka fyrir sig.

Cruise deildi mynd frá sýningunni á Twitter-síðu sinni þar sem hann sagði 2.000 manns hafa lagt á sig fjögurra tíma göngu til að geta séð myndina á topp klettsins.

2,000 feet, 2,000 people, 4 hours of hiking. The most impossible screening of #MissionImpossible Fallout. Thank you all for coming! I wish I could have been there. pic.twitter.com/ufi1FkP6KI

— Tom Cruise (@TomCruise) August 2, 2018

Fallout-myndin er sú mynd í þessari kvikmyndaseríu sem hefur fengið bestu dómana. Gagnrýnandi IndiWire segir hana vera bestu hasarmynd áratugarins.