Nýjasta Jókermyndin virðist afar dularfull og vekur fjölda spurninga hjá netverjum

Nýjasta myndin um Jókerinn, erkióvin Leðurblökumannsins, er að vekja talsverða athygli í netheimum. Þá sérstaklega vegna þess hversu óvenjuleg hún virðist eiga eftir að vera.

Lítið er vitað um söguþráðinn annað en að hún mun segja frá lífi mannsins sem verður að Jókernum. 

Þeir sem engar upplýsingar vilja fá um þessa mynd eru beðnir um að láta staðar numið hér.

Leikarinn Joaquin Phoenix mun fara með hlutverk Arthur Fleck sem talið er að eigi eftir að verða hinn alræmdi Jóker. Leikstjóri þessarar myndar, Todd Philips, birti mynd af Joaquin Phoenix sem Arthur á Instagram í vikunni. Myndin kom mörgum að óvörum, enda hafa aðstandendur mynda sem innihalda Jókerinn oftast birt fyrstu myndir af karakternum með trúðamálningu framan í sér. 

Það var ekki raunin í þetta skiptið heldur fengu aðdáendur að sjá fremur venjulega mynd af Arthur Fleck þar sem hann er eilítið tekinn í framan. 

Tökur myndarinnar hófust í september og rötuðu myndir af tökustað í fjölmiðla skömmu síðar. Þar sást Phoenix leika á móti manni í trúðabúningi sem ætti að gefa til kynna hvert Arthur Fleck stefnir í þessari mynd. 

Áður höfðu Jack Nicholson, Heath Leadger og Jared Leto leikið Jókerinn á hvíta tjaldinu en á meðal leikara í þessari mynd er Robert DeNiro sem er sagður eiga að leika spjallþáttastjórnanda sem er talinn eiga sinn þátt í því að Arthur Fleck fetar myrka slóð sem Jókerinn. 

„Þessi mynd virðist vera einstök, sér á báti á einhvern hátt, og kannski vegna þess að hún virðist hræða líftóruna úr mér,“ sagði Phoenix við Collider um myndina. 

Talið er að myndin muni gerast í borginni Gotham á níunda áratug síðustu aldar. Er orðrómur um að Arthur Fleck eigi að vera reyna að skapa sér nafn sem uppistandari. Það á víst að ganga illa hjá honum og er hann sagður eiga að fá einskonar taugaáfall eftir að hafa orðið fyrir ítrekaðri höfnun.

Fjölmiðlar vestanhafs hafa flutt fregnir af því að teiknimyndasagan The Killing Joke eigi að vera undirstaða handrits myndarinnar. Er þessi myndasaga talin ein sú besta þar sem saga Jókersins er sögð. Þar er Jókerinn sagður misheppnaður uppistandari sem missir konuna sína og afmyndast í framan í ráni sem fer úrskeiðis. 

Er Jókerinn í þessari mynd sagður hafa engar tengingar við aðrar myndir þar sem hann hefur birst. 

Kvikmyndaverið Warner Bros. hefur gefið til kynna að þessi mynd verði með sjálfstæðan söguþráð. Jared Leto lék síðast Jókerinn í Suicide Squad og hefur skuldbundið sig til að leika þann karakter í tveimur myndum til viðbótar. 

Er búist við að Joker verði frumsýnd í kvikmyndahúsum í október á næsta ári en íslenska kvikmyndatónskáldið Hildur Guðnadóttir mun semja tónlist myndarinnar.