Aukin framlög Íslands til bágstaddra í Jemen

Guðlaugur Þór utanríkisráðherra tók í morgun þátt í sérstakri framlagaráðstefnu um Jemen sem Sameinuðu þjóðirnar og ríkisstjórnir Svíþjóðar og Sviss stóðu fyrir. Þar hét hann 30 milljóna króna viðbótarframlagi íslenskra stjórnvalda til mannúðaraðstoðar í landinu, sem verður ráðstafað í samstarfi við Mannfjöldasjóð Sameinuðu þjóðanna (UNFPA).

„Stærsta neyðin í heiminum í dag ríkir í Jemen þar sem áttatíu prósent þjóðarinnar þurfa á neyðaraðstoð að halda. Við höfum lagt áherslu á að aðstoðin nái til barna og kvenna sem eru í sérstaklega bágri stöðu í Jemen,“ sagði Guðlaugur Þór. Í ræðu sinni lagði hann jafnframt áherslu á að bundinn verði endi á átökin sem hafa staðið frá árinu 2015.

Fyrr á árinu lögðu íslensk stjórnvöld 36 milljónir til UNFPA og vörðu rúmum 19 milljónum til aðstoðar við jemensk börn í samstarfi við Barnaheill. Markmiðið með framlögum til UNFPA er að bæta heilsugæslu í Jemen til að mæta bágborinni stöðu kvenna sem sætt hafa ofbeldi og veita mæðrum og þunguðum konum neyðarþjónustu.

Með framlaginu er ljóst að framlög til mannúðaraðstoðar í Jemen nema að lágmarki 85 milljónum á þessu ári og hafa þá náð rúmum 150 milljónun á undanförnum mánuðum. Framlögunum hefur einnig verið ráðstafað í samstarfi við Barnahjálp Sameinuðu þjóðanna (UNICEF), Matvælaáætlun Sameinuðu þjóðanna (WFP) og Alþjóðaráð Rauða krossins (ICRC).

Guðlaugur Þór flutti einnig ræðu í mannréttindaráðinu fyrir hönd Norðurlandanna og Eystrasaltslandanna gegn dauðarefsingum. Hann sagði áhyggjuefni hversu oft dauðarefsingum væri beitt gegn minnihlutahópum og þeim sem minnst mega sín. Hann lagði þó áherslu á að töluverðar framfarir hefðu orðið á undanförnum árum og dauðarefsing viðgengist nú í innan við þriðjungi ríkja heims.

Í dag hitti utanríkisráðherra einnig Michelle Bachelet, mannréttindastjóra Sameinuðu þjóðanna, og ræddi við hana um mannréttindi, framlag Íslands til skrifstofu mannréttindastjórans og nýlega fullgildingu bókunar við samning Sameinuðu þjóðanna gegn pyntingum.

Guðlaugur Þór hefur einnig átt tvíhliða fundi með utanríkisráðherrum nokkurra ríkja sem staddir eru í Genf. Í gær hitti hann Mariu Ubach, utanríkisráðherra Andorra, og ræddi við hana um Evrópumál. Á fundi þeirra Mariju Pejcinovic Buric, utanríkisráðherra Króatíu, voru mannréttindamál og málefni Evrópuráðsins til umfjöllunar.

Í dag hitti Guðlaugur Þór Josep Borrell Fontelles, utanríkisráðherra Spánar, og ræddi við hann um málefni Katalóníu og tvíhliða samskipti Íslands og Spánar, meðal annars á sviði viðskipta og ferðamennsku. Á fundi með Retno Lestari Priansari Marsudi, utanríkisráðherra Indónesíu, var helst rætt um tvíhliða viðskipti ríkjanna og mögulegan tvísköttunarsamning þeirra á milli en nýverið var gengið frá fríverslunarsamningi EFTA og Indónesíu. Einnig ræddu ráðherrarnir samstarf í jarðahita- og sjávarútvegsmálum. Marsudi gegndi á sínum tíma embætti sendiherra Indónesíu gagnvart Íslandi og þekkir ágætlega til Íslands. Guðlaugur hitti sömuleiðis utanríkisráðherra Belgíu, Didier Reynders, og ræddi við hann mannréttindamál og málefni Evrópuráðsins.

Að endingu hitti Guðlaugur Þór framkvæmdastjóra EFTA, Henri Gétaz, til að ræða stöðu yfirstandandi fríverslunarviðræðna samtakanna.

Ræða utanríkisráðherra á framlagaráðstefnu vegna Jemen

Ræða utanríkisráðherra gegn dauðarefsingum

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.