Flottir laxar að nást í klakveiðinni

Klakveiðin í Eystri Rangá er ólíkt því sem gerist í mörgum ánum því í Eystri Rangá leggja menn áherslu á að ná snemmgengnum laxi í klak.

Til að ná þessum löxum fara nokkrir vaskir veiðimenn í Eystri Rangá snemmsumars til að ná nokkrum af fyrstu löxunum í klak og sérstök áhersla er á að ná stórum löxum.  Þetta skilar þeim árangri að stórlaxahlutfallið í Eystri Rangá er feykna gott og árangurinn af þessu ræktunarstarfi klárlega að skila sér.  Sem dæmi má nefna að um 45% af veiddum laxi í Eystri Rangá er stórlax eða tveggja ára fiskur.

Fyrstu laxarnir eru þegar komnir í klakkistur og í dag bættust 10 stórlaxar við.  Nokkrir af þeim veiðimönnum sem veiða í klakið voru við Eystri Rangá í dag og náðust 10 laxar á land sem fóru allir í klakkistur og sá stærsti var 94 sm hængur sem veiddist á Hofteigsbreiðu en sá veiðistaður er alltaf að koma sterkari inn með hverju árinu.  Það er mjög óvenjulegt að það sé svona mikið líf snemma í júní en í báðum Rangánum er greinilega nokkuð gengið af laxi.  Rangárnar eru með vinsælustu og fengsælustu veiðiám landsins og það er því klárt mál að þeir sem eiga daga í henni í sumar, þá sérstaklega snemma tímabilsins, hljóta að fagna fréttum af snemmgengnum laxi því aðalgöngurnar eru ekki byrjaðar og ef þetta er byrjunin þá hlýtur framhaldið að lofa góðu.