Sossa segir Reykjanesið leynda perlu

Myndlistakonan Sossa býr og starfar í Reykjanesbæ þar sem hún ólst upp. Hún segir Reykjanesið geyma margar perlur sem gaman er að skoða og upplifa. Heimabærinn hennar, Keflavík hefur löngum haft yfir sér framandi yfirbragð og blómstrandi menningarlíf. Vísir mælir með heimsókn á Reykjanesið.

„Hér er gott að starfa og fínt að búa, stutt til höfuðborgarinnar og stutt út í heim,“ segir Sossa en Keflavík hefur löngum skorið sig úr flóru íslenskra sveitarfélaga vegna nálægðarinnar við útlönd ef svo má segja. Hvernig var að alast þar upp?

Annar menningarheimur

„Ég fluttist til Keflavíkur þriggja ára gömul. Þegar ég man fyrst eftir mér einkenndist bærinn svolítið af veru herliðsins á Keflavíkurflugvelli. Hernum fylgdi annar menningarheimur, ameríska sjónvarpið, útvarpsstöðvar og sælgæti sem á einhvern hátt komust út fyrir Keflavíkurhliðið, og svo “príslistar” þar sem pöntuð voru föt frá henni Ameríku og þeim svo smyglað niður í bæinn,“ rifjar Sossa upp. Krakkarnir frá Keflavík hafi skorið sig úr í klæðaburði. Einnig fengu þau erlenda popptónlist beint í æð.

„Tónlistin skipaði stóran sess hjá okkur unglingunum, lituð af ameríska útvarpinu,“ segir Sossa.

„Það var spennandi að alast upp í hratt vaxandi bæ. Íbúar komu allsstaðar af landinu og allir tóku þátt í uppbyggingu samfélagsins, unnu í fiskinum og svo byggði herinn upp flugvöllinn. Enn þann dag í dag er stór hluti atvinnulífsins tengdur flugvellinum og ferðamannaiðnaðinum,“ segir Sossa. Í dag blómstri einnig menningarlífið og ber þar hæst bæjarhátíðina Ljósanótt, sem fram fer á hverju hausti en allt árið um kring iðar bærinn af fjölbreyttu menningarlífi.

„Hin seinni ár hefur menningarlífið fengið stærri sess í bæjarfélaginu“ segir Sossa. „Tónlistarhöll og svo Duus húsin sem hýsa listasafn Reykjanesbæjar en þar er unnið afar metnaðarfullt starf og svo eru sýningar frá byggðasafni Reykjanesbæjar. Þegar ég fæ gesti til mín býð ég þeim að sjálfsögðu á vinnustofuna í Duushúsin og svo til leirlistakonunnar Drífu Káradóttur sem er með fallega vinnustofu hér í bænum.“

Leyndar perlur

Beðin um skothelda uppskrift að góðum degi á Reykjanesi segir Sossa lítið mál að gera frábæra ferð um nesið.

„Ég færi með gestina í góðan göngutúr með fram sjónum á fallegum göngustígum. Í hádeginu væri hægt að stoppa á einhverjum af mörgum veitingastöðum bæjarins, til dæmis á Library. Ég myndi síðan keyra út í Garð, skoða fjöruna og vitann, svo Sandgerði, Þekkingarsetrið og út í Hafnir og líta á fallegu kirkjuna þar, áfram út á Reykjanestá, að Gunnuhver og stoppa svo til að horfa á brimið við klettaströndina. 

Reykjanesið er nefnilega leynd perla sem býður upp á fallega náttúru, Kleifarvatn, Seltún, Eldborg, Krísuvíkurbjarg, Húshólma, Selatanga, Geldingadali, Djúpavatn, Sogin, Reykjanesvita og Sandvík svo eitthvað sé nefnt. Eftir daginn mætti svo borða kvöldmat á nýjum veitingastað The Brigde sem er á Hótel Marriott. Fólkið gæti síðan valið að gista á einhverju hótela bæjarins en ef á að tjalda þá er ágætis tjaldstæði í Garði og Grindavík. Í Grindavík er einnig einn af mínum uppáhaldsveitingastöðum, Hjá Höllu. Ég mæli með þeim stað og fer gjarnan með mína gesti þangað.“